Wararka24: Dowladaha Soomaaliya iyo Shiinaha ayaa kala saxiixday heshiis cusub oo u oggolaanaya in badeecadaha kalluumeysiga Soomaaliya loo dhoofiyo suuqyada Shiinaha iyadoo laga dhaafayo canshuuraha, sida ay sheegtay Wasaaradda Kalluumeysiga iyo Dhaqaalaha Buluugga ee Soomaaliya.
Heshiiska ayaa magaalada Muqdisho waxaa ku kala saxiixday Wasiirka Kalluumeysiga iyo Dhaqaalaha Buluugga, Axmed Xasan Aadan, iyo Safiirka Shiinaha ee Soomaaliya, Wang Yu. Dowladda Soomaaliya ayaa sheegtay in heshiiskan uu yahay tallaabo muhiim ah oo lagu xoojinayo iskaashiga dhaqaale ee labada dal.
Wasaaradda Kalluumeysiga ayaa sheegtay in tani ay tahay markii ugu horreysay ee badeecadaha kalluunka Soomaaliyeed ay si rasmi ah u helaan fursad ay canshuur-dhaaf ugu galaan suuqa Shiinaha. Sida wasaaraddu sheegtay, arrintan ayaa la filayaa inay kordhiso dhoofinta kalluunka, korna u qaaddo tartanka iyo dakhliga kalluumeysatada iyo ganacsatada Soomaaliyeed.
Wasiir Axmed Xasan Aadan ayaa sheegay in heshiisku uu abuuri doono fursado cusub oo maalgashi iyo iskaashi oo dhinaca kalluumeysiga ah, isla markaana uu gacan ka geysan doono horumarinta dhaqaalaha buluugga ee dalka.
Dhankiisa, Safiirka Shiinaha ee Soomaaliya, Wang Yu, ayaa sheegay in heshiiskan uu fududeyn doono ganacsiga labada dal, islamarkaana uu xoojin doono iskaashiga dhaqaale iyo is-weydaarsiga ganacsiga.
Wasaaradda Kalluumeysiga ayaa ugu dambeyn ku tilmaantay heshiiska tallaabo muhiim ah oo lagu kobcinayo dhoofinta badeecadaha Soomaaliyeed, laguna abuurayo fursado shaqo iyo horumar dhaqaale oo waara.
