Wararka24: Wasiirka Wasaaradda Warfaafinta, Dhaqanka iyo Dalxiiska Soomaaliya, Cabdifataax Qaasim Maxamuud, ayaa magaalada Nairobi kulan kula yeeshay Wakiilka Sare ee Hindiya u fadhiya Kenya ahna Safiirka Hindiya ee Soomaaliya, Adarsh Swaika. Kulanka ayaa diiradda lagu saaray xoojinta xiriirka iyo iskaashiga labada dal ee dhinacyada warbaahinta iyo dhaqanka.
Labada dhinac ayaa ka wada hadlay sidii loo horumarin lahaa wada-shaqeynta hay’adaha warbaahinta ee Soomaaliya iyo Hindiya, iyadoo si gaar ah loo eegay fursadaha lagu kobcin karo aqoonta iyo xirfadaha shaqaalaha ka howlgala dhinacyada warbaahinta iyo dhaqanka.
Kulanka waxaa sidoo kale lagu falanqeeyay muhiimadda ay leedahay u guurista nidaamyada dhijitaalka ah iyo adeegsiga tiknoolajiyadda casriga ah ee warbaahinta. Arrintan ayaa qayb ka ah dadaallada lagu horumarinayo awoodda hay’adaha warbaahinta iyo sidii loo kordhin lahaa adeegyada ay bulshada siiyaan.
Mas’uuliyiintu waxay sidoo kale ka wada hadleen xoojinta xiriirka kooxaha fanka iyo dhaqanka ee labada dal. Iskaashigan ayaa lagu sheegay inuu fursad u noqon karo in la is dhaafsado khibradaha iyo aqoonta la xiriirta horumarinta dhaqanka iyo hal-abuurka.
Wasiir Cabdifataax Qaasim ayaa uga mahadceliyey dowladda Hindiya taageerada iyo iskaashiga ay la garab taagan tahay Soomaaliya, gaar ahaan dadaallada lagu xoojinayo awoodda warbaahinta qaranka. Waxa uu sidoo kale carrabka ku adkeeyay muhiimadda ay leedahay horumarinta xirfadaha shaqaalaha ka howlgala warbaahinta iyo dhaqanka.
Labada dhinac ayaa isla eegay fursadaha lagu ballaarin karo iskaashiga mustaqbalka, iyadoo laga faa’iideysanayo khibradaha iyo awoodaha ay labada dal ku leeyihiin warbaahinta, dhaqanka iyo tiknoolajiyadda. Kulanka ayaa qayb ka noqonaya dadaallada Soomaaliya ay ku raadinayso iskaashi caalami ah oo taageera horumarinta hay’adaha warbaahinta iyo dhaqanka.
Wada-hadalladan ayaa kusoo beegmaya xilli Soomaaliya ay waddo dadaallo lagu casriyeynayo nidaamyada warbaahinta iyo kor loogu qaadayo xirfadaha shaqaalaha, iyadoo iskaashiga caalamiga ah loo arko mid ka caawin kara hay’adaha dalka inay la jaanqaadaan isbeddellada tiknoolajiyadda iyo warbaahinta dhijitaalka ah.
