Wararka24: 28-02-2026 Falcelin xooggan ayaa ka dhalatay dagaalka maanta ka qarxay Bariga Dhexe, kaddib markii Mareykanka iyo Israa’iil ay weerar ku qaadeen Tehran, halka Iiraan ay si degdeg ah jawaab uga bixisay iyadoo beegsatay saldhigyo Mareykan ah oo ku yaalla dalalka Khaliijka.
Qaraxyo ayaa laga maqlay waddamo ay ka mid yihiin Qatar, Sacuudi Carabiya, Imaaraadka, Baxreyn iyo Kuwait, iyadoo dowladahaasi ay soo saareen bayaano kala duwan.
Wasaaradda Arrimaha Dibadda Imaaraadka Carabta ayaa sheegtay in ay xaq u leeyihiin is-difaac, isla markaana aysan aqbali doonin weerarro lagu soo qaado dhulkooda.
Sacuudi Carabiya ayaa si adag u cambaareysay gantaallada lagu soo tuuray, iyadoo ku tilmaantay xadgudub ka dhan ah madaxbannaanideeda.
Qatar ayaa iyaduna sheegtay in weerarka lagu qaaday dhulkeeda uu dhaawacayo madaxbannaanida qaranka, halka Kuwait ay ku tilmaantay gantaallada ku dhacay gudaha dalkeeda xadgudub bareer ah oo ka dhan ah sharciga caalamiga ah.
Dalalkan ayaa badankood martigeliya xarumo iyo saldhigyo ay leeyihiin ciidamada Mareykanka.
Xaaladda gobolka ayaa weli ah mid kacsan, iyadoo ay jirto cabsi laga qabo in dagaalku sii fido oo uu saameeyo dalal kale. Ilaa hadda, ma jiro war rasmi ah oo muujinaya in la gaaray dadaal diblomaasiyadeed oo lagu qaboojinayo xiisadda sii xoogeysaneysa.
