Dar es Salaam – Sabti, 1-da November 2025 – Madaxweynaha Tanzania, Samia Suluhu Hassan, ayaa guul weyn ka gaartay doorashadii madaxtinimo ee dalkaas, kadib markii ay heshay ku dhowaad 98% codadka, sida ay shaaciyeen guddiga doorashooyinka qaranka ee Tanzania (INEC).
Guddoomiyaha guddiga doorashooyinka, Jacobs Mwambegele, ayaa ku dhawaaqay in Samia Suluhu ay si rasmi ah ugu guuleysatay kursiga madaxtinimada, iyadoo matalaysa xisbiga talada haya ee CCM. Wuxuu sheegay in Suluhu ay heshay 31,913,866 cod, halka tirada guud ee dadka codkooda dhiibtay ay ahayd 32,678,844 qof.
Natiijooyinkan ayaa siinaya Madaxweyne Samia Suluhu awood buuxda oo ay dalka ku hoggaamiso muddo shan sano ah.
Samia Suluhu, oo xilka qabatay sanadkii 2021 kaddib geeridii Madaxweynihii hore John Pombe Magufuli, ayaa doorashadan ku xaqiijisay hoggaankeeda, iyadoo noqotay haweeneydii ugu horreysay ee madaxwayne ka noqota Tanzania.
Dhanka kale, dowladda Tanzania ayaa sheegtay in aysan weli xaqiijin tirada rasmiga ah ee dadka ku dhintay mudaaharaadyadii dhacay kadib doorashada, iyadoo wasiirka arrimaha dibadda, Mahmoud Thabit Kombo, uu sheegay in dowladdu weli ururinayso xogta la xiriirta khasaaraha iyo burburka hantida guud.
“Waqtigan xaadirka ah cidna ma sheegi karto tirada saxda ah ee dadka dhintay ama dhaawacmay. Weli waxaan helaynaa warbixino ku saabsan hanti burburtay iyo gaadiidkii shirkadda korontada ee TANESCO ee la gubay,” ayuu yiri wasiirka oo la hadlay BBC-da.
Kooxo mucaarad ah ayaa ku eedeeyay dowladda in rabshadahaas lagu dilay boqolaal qof, balse dowladda Tanzania ayaa sheegtay in xogahaasi aanay xaqiiqo ahayn.
Sidoo kale, dowladda ayaa difaacday tallaabooyinkii lagu xaddiday adeegyada internet-ka, iyadoo sheegtay in ay ahaayeen kuwo amni, ma ahayn caburin muwaadiniin.
Doorashadan ayaa lagu tilmaamay mid xoojinaysa hoggaanka Samia Suluhu iyo saameynta siyaasadeed ee xisbiga CCM ee dalka Tanzania, iyadoo ay u horseeday kalsooni cusub oo gudaha iyo dibadda ah.
