Wararka24: Saddex diyaaradood oo sida ciidamo iyo hub ayaa gaaray degmada Buurhakaba ee gobolka Baay, iyadoo ay sii kordhayaan dhaq dhaqaaqyada militari ee ka socda Koonfur Galbeed.
Ilo amni ayaa sheegay in diyaaradahaasi ay wadeen ciidamo kala duwan oo isugu jira kuwa Macawiisley ah, ciidamo la magac baxay Badbaadada Koonfur Galbeed iyo xubno ka tirsan milateriga Soomaaliya.
Ciidamadan ayaa la sheegay in laga kala qaaday magaalooyinka Muqdisho, Xudur iyo Waajid, kuwaas oo haatan lagu uruuriyay gudaha degmada Buurhakaba.
Wararka ayaa tilmaamaya in magaalada Buurhakaba uu ka socdo abaabul xooggan iyo isku dubarid ciidan, iyadoo la qorsheynayo dhaq dhaqaaqyo la xiriira magaalada Baydhabo.
Dowladda Federaalka iyo siyaasiyiin la safan ayaa doonaya inay ka hortagaan qorshaha doorasho ee ka socda Baydhabo, kaas oo uu wado madaxweynaha Koonfur Galbeed Cabdicasiis Lafta-gareen.
Dowladda Soomaaliya ayaa horay u sheegtay in aysan aqoonsaneyn sharciyadda Lafta-gareen, iyadoo si toos ah ula shaqeyneysa maamulada degmooyinka Koonfur Galbeed.
Xaaladda ayaa sii kacsan, waxaana jira walaac ku aaddan in dhaq dhaqaaqyada militari ay horseedi karaan iska hor imaad cusub.
DAAWA
