Wararka24: Maamulka Puntland ayaa bilaabay howlgallo amni oo lagu baadigoobayo Dr. Faarax Cabdi Maxamed, oo ka mid ahaa dhakhaatiirta ka shaqeysa hay’adda Médecins Sans Frontières ee ka howlgasha Isbitaalka Guud ee Gaalkacyo, kadib markii uu afduub u gacan galay koox hubeysan.
Dhakhtarka ayaa maalintii labaad ku jira gacanta kooxdii afduubatay, iyadoo weli aan la hayn faahfaahin rasmi ah oo ku saabsan halka lagu hayo ama cidda ka dambeysa falkaasi. Tani ayaa sare u qaaday walaaca laga qabo badqabka shaqaalaha caafimaadka ee ka howlgala gobolka Mudug.
Wasaaradda Caafimaadka Puntland ayaa si kulul u cambaareysay afduubka, iyada oo sheegtay in falkaasi uu yahay mid ka baxsan bini’aadantinimada isla markaana halis gelinaya adeegyada caafimaad ee bulshada. Wasaaraddu waxay xustay in Dr. Faarax uu ahaa xirfadle muddo dheer u adeegayay bulshada, doorna ka qaatay badbaadinta nolosha shacabka.
Sidoo kale, wasaaraddu waxay ka digtay in dhacdooyinka noocan oo kale ah ay cabsi ku abuuri karaan bahda caafimaadka, isla markaana ay wiiqi karaan adeegyada muhiimka ah ee ay bulshada u hayaan, gaar ahaan xilli ay jirto baahi weyn oo loo qabo daryeel caafimaad.
Maamulka Puntland ayaa ugu baaqay hay’adaha amniga ee gobolka Mudug inay si degdeg ah u xoojiyaan howlgalada lagu soo badbaadinayo dhakhtarka, islamarkaana la horkeeno cadaaladda cid kasta oo ku lug leh afduubka.
Ugu dambeyn, shacabka deegaanka ayaa lagu booriyay inay la shaqeeyaan ciidamada ammaanka, si loo helo xogta sahli karta sii deynta Dr. Faarax, loogana hortago falalka amni darro ee soo noqnoqda.
