Wararka24: Dowladda Puntland ayaa si adag uga hadashay duqeymo maalmihii lasoo dhaafay ka dhacay xeebaha gobolka Nugaal, iyadoo dalbatay in dowladaha ama dhinacyada ka dambeeyay ay si degdeg ah uga bixiyaan sharaxaad. Hadalka Puntland ayaa kusoo beegmaya xilli ay xeebaha Soomaaliya dib uga soo cusboonaadeen falal la xiriira burcad-badeednimo iyo afduubka maraakiibta.
War-saxaafadeed ay soo saartay Wasaaradda Amniga iyo DDR-ta Puntland ayaa lagu sheegay in maamulka uu baaritaan ku hayo xog muujineysa in falalka cusub aysan ku koobneyn kooxo burcad-badeed oo maxalli ah. Puntland waxay sheegtay inay jiraan “awoodo ka baxsan Puntland” oo laga yaabo inay qayb ka yihiin howl-galladaas, balse ma aysan magacaabin dhinacyada ay tuhunsan tahay.
Maamulka ayaa sidoo kale sheegay inay jiraan mas’uuliyiin siyaasadeed iyo dhaqaale oo, sida uu hadalka u dhigay, gabaad siinaya kooxaha burcad-badeedda. Puntland ma aysan soo bandhigin caddeymo faahfaahsan oo xaqiijinaya eedeymahaas.
Puntland waxay sheegtay inay taageersan tahay dadaallada caalamiga ah ee lagula dagaallamayo burcad-badeednimada, isla markaana ay diyaar u tahay inay la shaqeyso dowladaha iyo hay’adaha ku howlan sugidda amniga xeebaha Soomaaliya. Hase yeeshee, maamulka wuxuu si gaar ah uga soo horjeestay duqeymo uu sheegay inay waxyeello u geysan karaan shacabka iyo hantidooda.
Khasaraha duqeymo 18-kii iyo 20-kii Agoosto ka dhacay deegaanka Garmaal ee gobolka Nugaal
Puntland waxay xustay duqeymo 18-kii iyo 20-kii Agoosto ka dhacay deegaanka Garmaal ee gobolka Nugaal, iyadoo sheegtay in dadka kalluumeysatada ah iyo hantidooda la beegsaday. Waxay dowladaha ay maraakiibtoodu ku lug lahaayeen howl-galladaas ka dalbatay inay sharaxaan ujeeddada iyo sababta duqeymaha.
Arrintan ayaa timid maalmo kadib markii markabka xamuulka ee M/V LUTUF, oo sita calanka Cameroon, ay koox hubeysan la wareegtay 17-kii Agoosto meel u dhow xeebaha degmada Eyl. Hay’adda UK Maritime Trade Operations ayaa sheegtay in siddeed nin oo hubeysan ay fuuleen markabka, kadibna ay la wareegeen gacan-ku-heyntiisa.
Warbixin ay Associated Press daabacday ayaa sheegtay in markabka uu siday hub iyo qalab isgaarsiineed oo ku wajahnaa xarun tababar oo Turkigu ku leeyahay Muqdisho. AP ayaa sidoo kale sheegtay in diyaarado helicopter ah iyo diyaarado aan duuliye lahayn oo Turkish ah ay la socdeen aagga kadib afduubka.
Maalintii xigtay waxaa deegaanka ka dhacday duqeyn lagu dilay afar qof laguna dhaawacay laba kale, hase yeeshee AP waxay sheegtay inaan si madax-bannaan loo xaqiijin cidda fulisay weerarka ama in dadka la dilay ay si toos ah ugu lug lahaayeen afduubka markabka.
Dowladda Turkiga ayaan si rasmi ah u caddeyn inay iyadu fulisay duqeynta. Sidaas darteed, inkastoo hadalka Puntland uu ku soo beegmayo dhacdooyin lala xiriirinayo howl-gallo Turkish ah, weli ma jiro xaqiijin madax-bannaan oo muujineysa in Turkigu mas’uul ka ahaa duqeymaha.
Duqeymahan iyo afduubka M/V LUTUF ayaa sare u qaaday walaaca laga qabo in burcad-badeednimada Soomaaliya ay mar kale dib u soo xoogeysato, xilli sanadihii lasoo dhaafay ay si weyn hoos ugu dhaceen weerarradii waaweynaa ee ka dhanka ahaa maraakiibta ganacsiga.
