Wararka24: Xubnaha siyaasiyiinta mucaaradka Soomaaliya ayaa xalay kulan gaar ah la yeeshay hoggaanka dhaqanka Soomaaliyeed, iyaga oo kala hadlay tabashooyinka iyo khilaafaadka siyaasadeed ee kala dhexeeya Madaxweynaha Soomaaliya Xasan Sheekh Maxamud.
Kulanka ayaa diiradda lagu saaray arrimaha siyaasadeed ee dalka, iyadoo mucaaradku ay soo bandhigeen saddex qodob oo ay sheegeen inay saldhig u yihiin muranka siyaasadeed ee haatan taagan.
Abdirahman Abdishakur Warsame oo madasha ka hadlay ayaa sheegay in khilaafka ugu weyn uu ku saleysan yahay wax ka beddelka dastuurka, muranka dhulka iyo hannaanka doorashooyinka dalka.
Cabdiraxmaan Cabdishakuur ayaa xusay in haddii wax laga beddelayo nidaamka federaalka ama dastuurka dalka, loo baahan yahay heshiis siyaasadeed oo loo dhan yahay, si looga fogaado khilaaf hor leh iyo kala qeybsanaan siyaasadeed.
Mucaaradka ayaa sidoo kale odayaasha dhaqanka ka codsaday inay door muuqda ka qaataan xal u helidda xaaladda siyaasadeed ee dalka, maadaama ay aaminsan yihiin in dalka uu marayo marxalad xasaasi ah oo u baahan wada-hadal iyo dhexdhexaadin.
Kulankan ayaa kusoo aadaya xilli hoggaanka dhaqanka Soomaaliyeed ay maalmihii lasoo dhaafay kulamo la lahaayeen madaxda sare ee dowladda, oo uu ku jiro Madaxweyne Xasan Sheekh, kaas oo ku adkeystay in dalka laga qabanayo doorasho qof iyo cod ah.
Khilaafka siyaasadeed ee u dhexeeya dowladda federaalka iyo mucaaradka ayaa sii xoogeysanaya, iyadoo wali aan la gaarin heshiis mideyn kara dhinacyada ku kala aragti duwan hannaanka doorashada iyo jihada siyaasadeed ee dalka.
