Wararka24: Dowladda Jamhuuriyadda Jabuuti iyo Midowga Yurub ayaa 16-kii July 2026 si rasmi ah u kala saxiixday heshiis la xiriira howlgalka badda ee EUNAVFOR ASPIDES, kaas oo lagu xoojinayo iskaashiga labada dhinac ee dhinacyada amniga badda iyo xasilloonida gobolka.
Heshiiska ayaa dejinaya qaab-dhismeedka sharci ee hagaya joogitaanka iyo howlaha ciidamada iyo shaqaalaha ka qeyb qaadanaya howlgalka ASPIDES. Waxa kale oo uu xoojinayaa wada-shaqeynta lagu horumarinayo amniga Badda Cas iyo ilaalinta xasilloonida gobolka.
Howlgalka EUNAVFOR ASPIDES waa hawlgal difaac oo uu Midowga Yurub u aas-aasay ilaalinta maraakiibta ganacsiga iyo xaqiijinta xorriyadda isu-socodka maraakiibta ee Badda Cas. Howlgalkan ayaa door muhiim ah ka qaata sugidda amniga mid ka mid ah marin-biyoodka ganacsiga ugu muhiimsan caalamka.
War-saxaafadeed ay si wadajir ah u soo saareen Midowga Yurub iyo Jabuuti ayaa lagu sheegay in saxiixa heshiiskan uu muujinayo kalsoonida iyo sida ay uga go’an tahay labada dhinac xoojinta nabadda, amniga iyo iskaashi ku saleysan ixtiraamka sharciga caalamiga ah, xasilloonida gobolka iyo wada-shaqeynta dhinacyada badan.
Qoraalka ayaa sidoo kale lagu xusay in Midowga Yurub uu sii ahaanayo lammaane istaraatiiji ah oo muhiim u ah Jabuuti, iyadoo goobta juqraafiyeed ee dalkaasi iyo kaalinta uu ku leeyahay amniga gobolka ay ka dhigayaan xubin muhiim u ah wax ka qabashada caqabadaha wadajirka ah iyo ilaalinta xorriyadda isu-socodka maraakiibta.
Labada dhinac ayaa muujiyay rajadooda ku aaddan sii xoojinta iskaashiga si loo gaaro himilooyin wadajir ah oo la xiriira amniga, xasilloonida iyo horumar waara ee gobolka.
