Wararka24: 29-01-2026:Warbixinno amni ayaa sheegaya in ciidamada Maraykanku ay bishan Janaayo ka fuliyeen gudaha Soomaaliya illaa 23 duqayn oo cirka ah, kuwaas oo intooda badan lala beegsaday dagaalyahanno ka tirsan kooxda Al-Shabaab iyo xubno lala xiriirinayo Daacish.
Duqaymahan ayaa la sheegay in ay ka dhaceen gobollo kala duwan oo dalka ah, gaar ahaan deegaannada ay wali ku sugan yihiin kooxaha hubeysan, iyadoo Mareykanku uu sii waday iskaashiga milatari ee uu la leeyahay Dowladda Federaalka Soomaaliya.
Sida ay tilmaamayaan ilo amni, duqaymaha ayaa qeyb ka ah istiraatiijiyad lagu wiiqayo awoodda kooxaha hubeysan, laguna taageerayo howlgalada ciidanka dowladda iyo kuwa deegaanka. Lama shaacin khasaare rasmi ah oo ka dhashay weerarradan, balse saraakiil ayaa sheegay in bartilmaameedyo muhiim ah la haleelay.
Dhanka kale, Dowladda Federaalka Soomaaliya weli kama aysan bixin faahfaahin rasmi ah oo ku saabsan tirada duqaymaha ama goobaha saxda ah ee ay ka dhaceen bishan Janaayo.
Arrintan ayaa kusoo beegmeysa xilli Senator Maryan Faarax Kaahiye, oo ka tirsan Golaha Aqalka Sare lagana soo doorto Jubbaland, ay maanta farriin culus u dirtay Guddoomiyaha Aqalka Sare, Cabdi Xaashi Cabdullaahi.
Senator Maryan ayaa dalbatay in Guddoomiyaha uu si cad u muujiyo mowqifkiisa ku aaddan xaaladda siyaasadeed ee dalka, gaar ahaan wax ka beddelka Dastuurka KMG ah ee ay wali ku howlan tahay Villa Soomaaliya.
Qoraal dheer oo ay soo saartay ayay ku sheegtay in Guddoomiyaha Aqalka Sare looga baahan yahay jawaab cad oo waafaqsan Dastuurkii 2012-kii, iyadoo muujisay walaac ku saabsan waxa ay ku tilmaantay ku tumasho dastuur.
“Waxaan waayey hal mar adigoo si cad u soo bandhigaya diidmadaada ku aaddan ku tumashada Dastuurkii lagugu dhaariyey. Taasi ayaa maanta igu kaliftay in aan kaa codsado caddaynta mowqifkaaga ku aaddan masiibada hadda hortaal Golaha Aqalka Sare muddo 24 saacadood ah,” ayay tiri Senator Maryan.
Hadalkan ayaa imanaya xilli ay sii kordhayaan khilaafaadka siyaasadeed ee la xiriira wax ka beddelka Dastuurka, iyadoo ay jiraan baaqyo isa soo taraya oo ku aaddan in la ilaaliyo heshiisyadii siyaasadeed iyo hannaankii dastuuriga ahaa ee dalka.
