Wararka24: Ra’iisul Wasaaraha Soomaaliya, Xamza Cabdi Barre ayaa xil cusub u magacaabay Ibraahim Aadan Ibraahim oo loo yaqaano Nadaara, kaas oo loo magacaabay Agaasimaha Guud ee Shaqaalaha iyo Taakuleynta Wasaaradda Gaashaandhigga Soomaaliya.
Magacaabistan ayaa si weyn u dhalisay dood siyaasadeed iyo walaac amni, maadaama Nadaara lagu xuso inuu hore uga tirsanaa kooxda Al-Shabaab kahor inta uusan dowladda isu soo dhiibin. Ilo siyaasadeed iyo warar hore ayaa sheegaya inuu xilal kala duwan kasoo qabtay deegaannada Bay iyo Bakool xilligii uu kooxda ku jiray.
Dowladda Federaalka Soomaaliya ayaa sanadihii dambe dhiirrigelineysay xubnaha Al-Shabaab inay kasoo baxaan kooxda, iyadoo taasi qayb ka dhigatay qorshaha lagu wiiqayo awoodda Al-Shabaab. Kadib markii uu kasoo baxay kooxda, Nadaara waxaa loo magacaabay xilal kala duwan oo dowladda ah.
Waxa uu horey usoo noqday Agaasime Ku-xigeenka Xarunta Tubsan oo ka shaqeysa ka hortagga fikirka xagjirka ah iyo dib-u-dhexgalka dadka kasoo baxa kooxaha hubeysan. Sidoo kale wuxuu soo noqday Agaasimaha Guud ee Wasaaradda Awqaafta iyo Arrimaha Islaamka Soomaaliya.
Dadka dhaliilsan magacaabistan ayaa sheegaya in shacabka aan si cad loogu sharixin habraacyada lagu hubiyo xubnaha kasoo goosta Al-Shabaab, gaar ahaan marka loo dhiibayo xilal muhiim ah oo la xiriira amniga iyo maamulka ciidamada.
Qaar kamid ah falanqeeyayaasha ayaa ku doodaya in dib-u-dhexgalka iyo baxnaaninta ay muhiim yihiin, balse loo baahan yahay hufnaan, isla xisaabtan iyo kalsooni dadweyne si looga hortago shakiga la xiriira magacaabista xilalka dowladda.
Ilaa hadda dowladda Federaalka Soomaaliya kama aysan bixin faahfaahin dheeraad ah oo ku saabsan heerka hubinta amni ee lagu sameeyay Nadaara iyo sababaha rasmiga ah ee loogu doortay xilkan cusub ee Wasaaradda Gaashaandhigga.
