Wararka24: 15-02-2026; Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa khudbad ka jeediyay Shir-Madaxeedka Midowga Afrika, isagoo ka hadlay arrimaha amniga, dimuqraadiyeynta, midnimada Afrika iyo difaaca madaxbannaanida Soomaaliya.
Madaxweynaha ayaa adkeeyay in Soomaaliya ay sii wadi doonto xoojinta wada-shaqeynta dalalka Afrika, gaar ahaan isku-duwidda codka Afrika ee Golaha Ammaanka Qaramada Midoobay. Wuxuu uga mahadceliyay dalalka xubnaha ka ah Midowga Afrika kalsoonida ay siiyeen Soomaaliya si ay uga mid noqoto Golaha Nabadda iyo Amniga Midowga Afrika muddada 2026–2028.
Sidoo kale, Madaxweyne Xasan Sheekh Maxamuud ayaa iftiimiyay guusha doorashooyinka qof iyo cod ee ka qabsoomay Gobolka Banaadir, isagoo ku tilmaamay tallaabo taariikhi ah oo xoojinaysa dowlad-dhiska, isla markaana muujisay diyaargarowga lagu ballaarinayo hannaanka doorashada tooska ah ee dalka.
Madaxweynaha Jamhuuriyadda ayaa ka hadlay faragelinta Israa’iil ee madaxbannaanida iyo midnimada dhuleed ee Soomaaliya, isaga oo uga mahadceliyay dalalka Afrika mowqifka mideysan ee ay ka qaateen xadgudubyadaas.
Ugu dambeyn, Madaxweyne Xasan Sheekh Maxamuud ayaa ku booriyay dalalka Afrika inay sii xoojiyaan midnimada iyo wada-shaqeynta, si xal waara loogu helo caqabadaha amni, siyaasadeed iyo dhaqaale ee qaaradda, isagoo xusay in madaxbannaanidu tahay tiirka horumarka mustaqbalka Afrika.
