Wararka24: 9-02-2026Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa sheegay in hadallada Madaxweyne Donald Trump ee ku aaddan Soomaaliya aysan wax saameyn ah ku yeelan doonin xiriirka rasmiga ah ee u dhexeeya labada dal.
Madaxweynaha ayaa xusay in inkastoo hadallada Trump ay ahaayeen kuwo aan dhiirrigelin lahayn, haddana xiriirka Soomaaliya iyo Mareykanka uu weli ku dhisan yahay iskaashi rasmi ah, wada-hadal joogto ah iyo dano wadaag ah. Waxa uu tilmaamay in Mareykanku door muuqda ka qaato taageerada la-dagaallanka argagixisada, dhismaha hay’adaha ammaanka, dowlad-dhiska iyo mashaariicda horumarineed ee dalka.
“Mareykanku waa dal weyn oo saaxiib nala ah. Waxaa jira wada-hadal joogto ah, heshiisyo amni iyo dhaqaale, iyo fursado maalgashi oo Mareykan ah oo Soomaaliya ka socda,” ayuu yiri Madaxweyne Xasan Sheekh.
Isagoo ka hadlayay arrimaha Somaliland iyo doorka Israa’iil, Madaxweynaha ayaa sheegay in Mareykanku u xaqiijiyay Dowladda Federaalka Soomaaliya inuusan aqoonsan doonin Somaliland, isla markaana uusan taageerayn tallaabo kasta oo wax u dhimaysa midnimada iyo wadajirka dhuleed ee Soomaaliya. Wuxuu intaas ku daray in arrimaha la xiriira Somaliland ay yihiin tallaabooyin hal dhinac ah oo aan ka tarjumayn mowqifka Mareykanka.
Ugu dambeyn, Madaxweyne Xasan Sheekh ayaa sheegay in Dowladda Soomaaliya ay si toos ah ula xiriirto Mareykanka, isla markaana wada-hadalladu ay sii socdaan, si loo ilaaliyo loona xoojiyo iskaashiga amni, dhaqaale iyo horumarineed ee labada dal.
