Wararka24: Dowladda Liibiya ayaa ku dhawaaqday xayiraado cusub oo saameynaya muwaadiniinta ka soo jeeda Soomaaliya, Itoobiya, Sudan iyo Eritrea, iyadoo tallaabadan lagu sheegay mid lagu xakameynayo socdaalka sharci darrada ah iyo qulqulka muhaajiriinta soo gala dalkaasi.
Go’aan uu soo saaray Ra’iisul Wasaaraha Liibiya ayaa dhigaya in la joojiyo gelitaanka muwaadiniinta afarta dal iyada oo loo marayo dhammaan marinada xuduudaha dalka, marka laga reebo dadka haysta oggolaansho shaqo oo sharci ah kana shaqeeya waaxyaha caafimaadka iyo waxbarashada.
Sidoo kale, Wasaaradda Arrimaha Gudaha ee Liibiya ayaa lagu amray inay qaaddo tallaabooyin lagu masaafurinayo ajaanibta aan haysan sharciyada deggenaanshaha, iyadoo dowladda ay sheegtay in tallaabadan looga gol leeyahay hagaajinta xaaladda gudaha iyo xoojinta amniga.
Mas’uuliyiinta Liibiya ayaa sheegay in go’aankan uu kusoo beegmayo xilli ay sii kordhayaan doodaha ku saabsan socdaalka sharci darrada ah iyo tirada muhaajiriinta ka imanaya dalalka Geeska Afrika. Liibiya ayaa muddo dheer ahayd marin muhiim ah oo ay muhaajiriintu uga gudbaan dhinaca Yurub.
Dowladda ayaa sidoo kale xustay inay qorsheyneyso xoojinta ilaalinta xuduudaha iyo dib-u-habeynta nidaamka shaqaalaha ajaanibta ah, si loo ilaaliyo amniga qaranka iyo xasilloonida dalka.
Go’aankan cusub ayaa la filayaa inuu saameyn ku yeesho kumannaan qof oo ka soo jeeda Soomaaliya iyo dalalka kale ee gobolka kuwaas oo u isticmaala Liibiya marin ay ugu sii gudbaan dalalka Yurub ama ay uga shaqeystaan gudaha dalkaasi.
