Dowladda Kenya ayaa si rasmi ah u diiday qorshe ay Somaliland ku doonaysay inay xafiiskeeda Nairobi u beddesho xafiis diblumaasiyadeed oo heer rasmi ah. Go’aankan ayaa yimid iyadoo Madaxweynaha cusub ee Somaliland, Cabdiraxmaan Maxamed Cabdullaahi (Cirro), uu booqasho ku joogo magaalada Nairobi.
Bayaan kasoo baxay Wasaaradda Arrimaha Dibadda ee Kenya ayaa lagu sheegay in xaflad lagu waday in lagu furto xafiis cusub 27-ka May aysan haysan wax oggolaansho ah oo rasmi ah oo ka yimid dowladda Kenya. waxay caddeysay in aysan aqbaleyn wax tallaabo ah oo heer diblumaasiyadeed ah oo ka dhan ah siyaasaddeeda midnimada Soomaaliya.
“Wasaaraddu waxay muujinaysaa walaac ku saabsan xaflad la qorsheeyay in lagu qabto 27-ka May, taas oo aan la helin oggolaanshihii waafaqsan siyaasadda arrimaha dibadda ee dalka,” ayaa lagu yiri bayaanka.
Kenya waxay mar kale ku celisay inay si buuxda u ixtiraamayso midnimada iyo madax-bannaanida Dowladda Federaalka Soomaaliya. Waxay sidoo kale hoosta ka xarriiqday in aysan aqoonsan Somaliland inay tahay dowlad madax-bannaan.
Inkasta oo Somaliland ay xiriir xafiiseed la leedahay Nairobi, haddana xiriirkaasi wuxuu xadidan yahay heerka xafiisyo isgaarsiineed (liaison offices),
Booqashada Madaxweyne Cirro ee Nairobi ayaa u muuqata dadaal cusub oo Somaliland ugu jirto inay kor u qaaddo xiriirka caalamiga ah iyo raadinta aqoonsi, hase yeeshee, mowqifka Kenya ayaa mar kale caddaynaya in aysan diyaar u ahayn wax isbeddel ah oo ka dhan ah midnimada Soomaaliya.
