Wararka24: Jeneraal Jimcaale Jaamac Takar iyo ciidamada Danab ee uu hoggaamiyo ayaa la sheegay inay heshiis la gaareen maamulka Puntland, kaddib muddo ay ciidamadu ka tirsanaayeen nidaamka dowladda Federaalka Soomaaliya. Sida ay sheegayaan wararka la helayo, heshiiska ayaa dhigaya in ciidamada dib loogu daro qaab-dhismeedka Ciidanka Difaaca Puntland.
Jeneraal Jimcaale ayaa hoggaamiya ciidamada Danab ee fadhigoodu yahay xerada Ligle ee duleedka Garoowe. Ciidamadan ayaa muddooyinkii u dambeeyay ka mid ahaa ciidamada dowladda Federaalka ee laga diiwaangeliyay Puntland, iyadoo dowladda Federaalka ay bixineysay mushaarkooda.
Sida lagu sheegay wararka laga helayo wada-hadallada, Puntland ayaa lagu wadaa inay ciidamada Danab si rasmi ah u diiwaangeliso, iyadoo la siinayo xuquuqdooda ciidan iyo mushaar. Tallaabadaas ayaa ka dhigan in ciidamada laga saaro diiwaanka dowladda Federaalka, isla markaana lagu soo celiyo silsiladda taliska Puntland.
Heshiiska ayaa daba socda wada-hadallo ay dhinacyada kala duwan ka wadeen gobolka Nugaal, kuwaas oo looga gol lahaa in lagu xalliyo khilaafka muddooyinkii dambe ka dhex jiray Gen. Jimcaale iyo maamulka Puntland. Wararka ayaa sheegaya in heshiiska lagu ilaalinayo xilka Jimcaale ee hoggaanka ciidamada Danab.
Arrintan ayaa ku soo beegmaysa kadib markii dowladda Federaalka ay bishii Juun 2026 Jimcaale Jaamac Takar u magacowday taliyaha qaybta 54-aad ee Ciidanka Xoogga Dalka ee fadhigeedu yahay Garoowe, sida ay sheegeen warbixinno xilligaas soo baxay.
Ciidamada Danab iyo Gen. Jimcaale ayaa horey khilaaf ula galay maamulka Puntland, gaar ahaan xilligii murankii siyaasadeed ee Garoowe ee 2023. Khilaafkaasi wuxuu mar dambe sababay in ciidamada uu hoggaamiyo Jimcaale ay xiriir la yeeshaan dowladda Federaalka, taas oo iyaduna bilowday bixinta mushaarkooda.
Wararka kasoo baxaya Puntland ayaa sidoo kale tilmaamaya in maamulka uu waddo dadaallo lagu mideynayo ciidamada kala duwan ee ku sugan deegaannadiisa, iyadoo la doonayo in ciidamada la hoos geeyo hal nidaam.
Haddii heshiiska Ligle si buuxda loo dhaqan geliyo, wuxuu noqon karaa tallaabo lagu yareynayo khilaafka ka dhashay ciidamada Federaalka ee ku sugnaa gudaha Puntland. Si kastaba, tallaabadani ma xallinayso dhammaan khilaafaadka siyaasadeed ee u dhexeeya dowladda Federaalka iyo Puntland, kuwaas oo weli ka dhex jiran arrimo dhowr ah.
