Tokyo – Dowladda Japan ayaa ku dhawaaqday in tirada dadka ku nool dalka ee gaadhay ama dhaafay da’da 100 sano ay gaartay 99,763 qof,
laga bilaabo 1-da Sebtembar 2025, taas oo ah rikoor cusub oo koror ah marka la barbar dhigo sannadkii hore. Tiradani waxay ka dhigan tahay in dadka cimri-dheer ee dalkaasi ay sii kordhayaan sanadba sanadka ka dambeeya.
Warbixinta rasmiga ah ayaa muujisay in haweenku ay ka badan yihiin 88% dadka centenarians-ka ah, taas oo caddeynaysa cimri-dheerida haweenka marka loo eego ragga.
Qofka ugu da’da weyn dalka ayaa ah Shigeko Kagawa oo 114 jir ah, kuna nool gobolka Nara, halkaas oo ay muddo dheer uga shaqeysay caafimaadka hooyada iyo dhallaanka ka hor inta aysan hawlgabin.
Kororka dadka cimri-dheer ayaa loo arkaa caqabad weyn oo dalka uu wajahayo, maadaama tirada dhalinyarada ay hoos u sii dhacday halka adeegyada caafimaadka iyo daryeelka bulshada ay sii kordhayaan. Dowladda Japan ayaa soo bandhigtay siyaasado lagu taageerayo qoysaska, oo ay ku jiraan fududeynta daryeelka carruurta iyo dhiirrigelinta shaqo-saaxiibtinimada, si loo xoojiyo dhalmada loona yareeyo saameynta dhaqaale ee ka dhalan karta hoos u dhaca dadka da’da yar.
Japan ayaa weli ah mid ka mid ah dalalka caalamka ugu cimriga dheer, balse waxaa muuqata in mustaqbalka dhow uu dalkaan wajihi doono baahi ballaaran oo ku saabsan adeegyada caafimaad iyo taageerada dadka waayeelka ah.
