Wararka24: 26-01-2026 Itoobiyaan ku nool dalka Mareykanka iyo urur u dooda xuquuqda muhaajiriinta ayaa dacwad sharci ah ka gudbiyay maxkamad federaal oo ku taalla Boston, kaddib markii maamulka Madaxweyne Donald Trump uu joojiyay barnaamij ilaalin muda-gaaban ah oo la siiyay kumanaan muhaajiriin Itoobiyaan ah, kaas oo loogu magacdaray Temporary Protected Status (TPS).
Dacwadda ayaa waxaa maxkamadda U gudbiyay saddex muwaadin Itoobiyaan ah iyo ururka aan faa’iido doonka ahayn ee African Communities Together, kuwaas oo ku sheegaya in go’aanka lagu joojiyay ilaalinta ay ku jiraan dhowr kun oo qof uu sharci daro yahay, islamarkaana halis gelinayo in dadkaasi loo celiyo dalkooda iyada oo xaaladaha ammaan ee Itoobiya ay wali halis yihiin.
Ururka iyo dadka dacwadda gudbiyay ayaa ku dooday in Waaxda Amniga Gudaha ee Mareykanka (Department of Homeland Security) ay sharci darro ku joojisay TPS, iyadoo aysan u hoggaansamin shuruudaha lagama maarmaanka u ah qiimeynta xaaladda ammaan ee Itoobiya, islamarkaana ay go’aankan ku saleysay siyaasad iyo “isir nacayb” taas oo ka dhan ah muhaajiriinta aan Cadadka Mareykanka ahayn.
TPS waa barnaamij federaal ah oo dadka ka soo qaxay wadamada ay ka jiraan iskahorimaad xoogan, dhibaatooyin bani’aadannimo ama masiibooyin dabiici ah ka ilaaliya in dalka laga masaafuriyo, islamarkaana u oggolaada inay sharci ahaan ku shaqeystaan kuna noolaadaan muddo cayiman.
Sannadkii 2022-kii, maamulka Madaxweyne hore Joe Biden ayaa geliyay Itoobiya TPS iyadoo lagu xusay xaaladaha amni ee halista ah ee dalkaas, laakiin maamulka Trump ayaa go’aansaday in xaaladdu hadda fiicantahay oo aan loo baahnayn in barnaamijkan sii jiro tallaabo taas ay dacwad oogayaasha ku tilmaameen mid aan sharci ahaan sax ahayn.
Dacwadda waxay sheegaysaa in joojinta TPS ay dadka Itoobiyaanka ah ka hor imanayso sharciga federaalka, islamarkaana ay khatar gelinayso noloshooda iyo arimo aasaasi ah sida helitaanka shaqo, adeegyada bulshada iyo badbaadada qoyskooda.
Kiiskan wuxuu qayb ka yahay dhowr dacwadood oo la xiriira go’aannada maamulka Trump ee la doonayo in lagu dhimo ama lagu joojiyo ilaalinta sharci ee muhaajiriinta ka timid wadamo ay ka jiraan colaado iyo dhibaatooyin waaweyn.
