Wararka24: Dowladda Israel ayaa la sheegay inay dalka Imaaraadka u dirtay nidaamka difaaca cirka ee Iron Dome iyo ciidamo qaabilsan hagidda nidaamkaas, xilli uu socdo dagaalka u dhexeeya Israel iyo Iran. Tallaabadan ayaa la sheegay inay timid maalmaihii hore ee dagaalka, sida ay xaqiijiyeen ilo amni iyo warbixinno diblomaasiyadeed.
Warbixinnadu waxay tilmaamayaan in iskaashiga dhinacyada milateriga, amniga iyo sirdoonka ee u dhexeeya Israel iyo Imaaraadka uu gaaray heer cusub, iyadoo markii ugu horreysay nidaamka Iron Dome si hawlgal ah loogu adeegsaday dal ka baxsan Israel iyo Mareykanka.
Sida ay sheegayaan ilo Israa’iili ah, Ra’iisul Wasaaraha Israel, Benjamin Netanyahu, ayaa amray in nidaamkan iyo ciidamo la socda loo diro Imaaraadka kadib wada-hadal uu la yeeshay Madaxweynaha Imaaraadka, Mohamed bin Zayed Al Nahyan.
Imaaraadka ayaa la sheegay inuu wajahay weerarro culus oo uga yimid Iran tan iyo markii dagaalka qarxay, iyadoo gantaallo iyo diyaarado aan duuliye lahayn lagu bartilmaameedsaday gudaha dalkaas, inkastoo inta badan hawada lagu qabtay.
Saraakiisha labada dhinac ayaa sheegay in nidaamka Iron Dome uu ka qeyb qaatay qabashada gantaallo badan oo kusoo wajahnaa gudaha Imaaraadka, taas oo sare u qaaday iskaashiga amni ee labada dal tan iyo heshiiskii diblomaasiyadeed ee ay kala saxiixdeen sanadkii 2020.
Tallaabadan ayaa loo arkaa mid xasaasi ah oo siyaasadeed, maadaama joogitaanka ciidamo Israa’iili ah gudaha Imaaraadka uu dhalin karo falcelin gobolka ah, balse sidoo kale muujinaysa heerka cusub ee iskaashi istiraatiiji ah ee labada dal.
