Mohammad Bagher Ghalibaf, Guddoomiyaha Baarlamaanka Iran ahna madaxa wadahadallada dalkaas ee Mareykanka, ayaa Arbacadii sheegay in codbixiyeyaasha Mareykanka ay dagaalka diideen doorashada Mareykanka ee xilliga dhexe, kaddib markii Dimuqraadiyiintu ay la wareegeen labada aqal ee Congress-ka.
“Damiirka ha ahaado ama qiimaha nolosha, dadka Mareykanku waxay yiraahdeen dagaal MAYA, fariintaasna waan taageersannahay,” ayuu Ghalibaf ku qoray barta X.
Wuxuu intaa ku daray in haddii dowladda Mareykanku ay khiyaanto rabitaanka shacabkeeda si ay ugu adeegto dhinacyo shisheeye, ay ogaan doonto in “MAYA-da” Iran ay la socoto “riyo xun.”
Khamenei oo ka digay rajo been ah
Hoggaamiyaha Sare ee Iran, Ayatollah Mojtaba Khamenei, ayaa qoraal uu soo dhigay boggiisa ku sheegay in qof kasta oo rajeynaya in dabeecadda Mareykanka ay isbeddeli doonto marka xisbiyadu is beddelaan, ama u maleeya in tanaasul la siiyo Mareykanka ay ka joojin doonto cadaawadda uu u hayo shacabka Iran, uu si weyn u qaldan yahay, sida ay werisay Gulf News.
Trump oo sheegay inuu dagaalka mar kale samayn lahaa
Trump oo wareysi siiyay Fox News ayaa qirtay in dagaalka Iran uu qayb ka ahaa guuldarrada xisbigiisa. Wuxuu sidoo kale u sheegay wargeyska The Wall Street Journal inuusan ka shanleysaneen dagaalka. “Kama fikiro. Waxaan sameeyay waxa saxda ah. Mar kale ayaan samayn lahaa,” ayuu yiri..
Trump ayaa sidoo kale Fox News u sheegay in Washington ay “wax weyn” samayn karto, isagoo ka hadlay suurtagalnimada “weerar culus” oo lagu qaado Iran, wuxuuna ku celiyay in Iran aysan weligeed heli doonin hub nukliyeer ah. Trump ayaa horey ugu hanjabay Iran weerar aad u culus.
Dagaalka ayaa bilaabmay 28-kii Febraayo 2026, markii Mareykanka iyo Israa’iil ay weerarro ku qaadeen Iran, lagana dilay Ayatollah Ali Khamenei oo ahaa hoggaamiyihii sare ee dalkaas. Trump ayaa qirtay in kororka qiimaha shidaalka uu dhaawacay Jamhuuriga doorashada.
Xiisadda Marinka Hormuz
Xiisadda ayaan weli dhammaan. Ciidanka Ilaalada Kacaanka Iran ayaa Arbacadii sheegay in afar markab oo shidaal sida, oo isku dayay inay maraan meel la mamnuucay oo ku taal koonfurta Marinka Hormuz, ay burbureen kaddib markii ay ku dhaceen miino badeed, ayna weli gubanayaan. Trump ayaa dhankiisa xaqiijiyay in Mareykanku uu weerarro xaddidan ku qaaday jasiiradda Qeshm.
Wadahadal aan toos ahayn ayaa socda iyadoo ay dhexdhexaadinayaan Qadar, Pakistan iyo Sacuudi Carabiya. Wakaaladda Reuters ayaa werisay in dhexdhexaadiyeyaasha Qadar ay filayaan inay 36 saac gudahood jawaab ka helaan wadahadallada Iran iyo Mareykanka oo ku saabsan fikrado cusub.
