Hoggaamiyaha xisbiga Jubilee ee dalka Kenya, Fred Matiang’i, ayaa Madaxweyne ku-xigeenkii hore Rigathi Gachagua ku eedeeyay kibir uu sheegay in uu kala jebin karo mucaaradka ka hor doorashada guud ee 2027, sida uu ka sheegay wareysi uu Axaddii, 1-da Nofeembar, siiyay telefishinka NTV.
Matiang’i wuxuu ka jawaabayay hadal uu Gachagua, oo hoggaamiya xisbiga DCP, ku sheegay in isaga, hoggaamiyaha xisbiga Wiper Kalonzo Musyoka iyo Edwin Sifuna oo hoggaamiya dhaqdhaqaaqa Linda Mwananchi ay ku filan yihiin dhismaha dowladda xigta. Gachagua wuxuu intaa ku daray in siyaasiyiinta kale ay ku soo biiri karaan haddii ay doonayaan.
“Kibirka tirada badan ka dhasha iyo is-faanintaas ayaa ah waxa kala jebin doona mucaaradka, kana dhigi doona arrin aad u adag in ay isu yimaadaan,” ayuu yiri Matiang’i, oo hore u ahaa Wasiirka Arrimaha Gudaha.
“Kenyaan gadaal looma dayn karo. Waa in qof kasta nala socdaa,” ayuu raaciyay.
Matiang’i wuxuu sidoo kale diiday in musharraxa madaxweynaha lagu xusho tirada codadka ee qowmiyadda uu ka soo jeedo. Wuxuu sheegay in hoggaamiyaha lagu qiimeeyo kartidiisa, dabeecaddiisa, aqoontiisa iyo waxqabadkiisa.
Wuxuu dib ugu noqday dhibaatadii ka dhalatay doorashadii 2007, isagoo sheegay in siyaasaddii xilligaas ay ka bilaabatay kibir, taas oo ugu dambeyntii keentay halhayskii “41 ka dhan ah 1”. Rabshadihii doorashadaas ka dib ka dhacay Kenya waxaa ku dhintay in ka badan 1,100 qof, boqolaal kun oo kalena way barakaceen.
Hoggaamiyaha Jubilee wuxuu ugu baaqay saaxiibbadiis mucaaradka ah in ay shacabka u bandhigaan siyaasaddooda iyo waxqabadkooda, halkii beelaha looga dhigi lahaa wax lagu gorgortamo.
wuxuu ka digay in midnimadu aysan keligeed guul dammaanad qaadayn, isagoo tusaale u soo qaatay Baraasiil oo uu sheegay in musharrax ay mucaaradku isugu yimaadeen uu dhawaan uga guuldareystay madaxweyne xilka haya.
Xiisadda Matiang’i iyo Gachagua ma aha mid cusub. Bishii May ee sanadkan, xulafada Gachagua waxay ku doodeen in gobolka Mt Kenya uu leeyahay codad go’aan ka gaari kara doorashada, sidaas darteedna hoggaamiyeyaasha kale ay isaga taageeraan, sida ay werisay wargeyska The Star.
Hadalka Matiang’i wuxuu yimid xilli ay mucaaradka ka dhex muuqato kala aragti duwanaansho kale. Warbaahinta Kenya ayaa sheegtay in Kalonzo lagu qayliyay Jimcihii, 30-ka Oktoobar, xilli la furayay xarunta Linda Mwananchi ee Nairobi.
Dhanka kale, Gachagua ayaa isla Axaddaas wareysi uu siiyay telefishinka Inooro ku sheegay in laga yaabo in uu Mareykanka u guuro haddii Madaxweyne William Ruto uu ku guuleysto xilli labaad..
Mucaaradka ayaan weli isku raacin musharrax keliya oo Ruto kula tartama doorashada 2027.
