Ra’iisul Wasaaraha Xukuumadda Federaalka Soomaaliya, Xamsa Cabdi Barre, ayaa Arbacadii guddoomiyay kulankii ugu horreeyay ee Guddiga Qaran ee Tallaalka iyo Cirib-tirka Dabaysha (SIPE) tan iyo markii si rasmi ah loo aasaasay. Kulanka ayaa looga hadlay sidii tallaalku u gaari lahaa carruurta aan weli helin, iyo in ilmo kasta oo Soomaaliyeed uu helo adeegyada caafimaadka ee aasaasiga ah..
Kulanka ayaa lagu ansixiyay qorshe-hawleedka lixda bilood ah ee Guddiga Fulinta ee Wadajirka ah. Qorshahan ayaa qeexaya mas’uuliyadda hay’adaha kala duwan iyo waqtiyada fulinta.
Xamsa oo dalbaday isla xisaabtan
Xamsa ayaa ku baaqay in cirib-tirka dabaysha lagu wajaho isla xisaabtan dhab ah. “Miisaaniyad kasta oo loo qoondeeyay tallaalka waa inay dhashaa natiijo cad, isla markaana tallaalkaas uu gaaraa ilmo kasta, iyadoo loo marayo hannaan daah-furan,” ayuu yiri, isagoo sheegay in waxqabadka lagu qiimeyn doono tirada carruurta la gaaray iyo tayada adeegyada la bixiyay.
Kulanka waxaa ka qaybgalay wasaaradaha Caafimaadka, Waxbarashada iyo Maaliyadda, wakiillo ka socday dowlad goboleedyada, iyo hay’adaha WHO, UNICEF, Gavi, Africa CDC iyo Gates Foundation.
Ka qaybgalayaashu waxay isku raaceen in la xoojiyo maalgelinta gudaha, wada-shaqeynta wasaaradaha iyo isla xisaabtanka hay’adaha caalamiga ah. Guddiga Fulinta ayaa lagu qiimeyn doonaa tirada carruurta la gaaro, cudurrada faafa ee laga hortago iyo sida fudud ee carruurtu u helaan tallaallada muhiimka ah.
Cirib-tirka dabaysha iyo carruurta aan la tallaalin
Xamsa ayaa 29-kii Juun 2024 daah-furay guddigan, kaas oo uu isagu guddoomiyo, sida ay markaas sheegtay UNICEF. Xilligaas, Wasaaradda Caafimaadka iyo Hay’adda Caafimaadka Adduunka (WHO) ayaa sheegay in Soomaaliya ay joogaan in ka badan 1.5 milyan oo ilmood oo aan weligood la tallaalin.
Cudurka dabaysha ayaa Soomaaliya ku faafayay toddoba sano oo aan kala go’ lahayn, waxaana laga soo bilaabo 2021 la xaqiijiyay 16 kiis oo dhammaantood ka dhacay koonfurta iyo bartamaha dalka, sida ay xilligaas sheegtay UNICEF.
