Wararka24: Guddiga Madaxa-bannaan ee Doorashooyinka Qaranka ayaa soo dhaweeyay go’aanka Maxkamadda Sare ee Soomaaliya ee lagu laalay natiijooyinkii doorashooyinka isku sidkanaa ee Golaha Wakiillada iyo Golayaasha Deegaanka Galmudug.
Maxkamadda Sare ayaa 24-kii Agoosto ku dhawaaqday in doorashooyinkii Galmudug ee 30-kii Luulyo aan loo maamulin si waafaqsan Dastuurka iyo Sharciga Doorashooyinka dalka, sidaas darteedna ay natiijooyinkii kasoo baxay yihiin kuwo aan sax ahayn.
Guddoomiyaha Maxkamadda Sare, Baashe Yuusuf Axmed, ayaa sheegay in khaladaadkii dhacay intii ay doorashadu socotay ay saameyn ku yeesheen hufnaanta iyo sharciyadda doorashada.
Maxkamaddu waxay Guddiga Doorashooyinka ku amartay inuu dib u qabto doorashooyinka Golaha Wakiillada iyo Golayaasha Deegaanka Galmudug, iyadoo lagu qabanayo waqtiga ugu dhow ee macquulka ah.
Guddiga Doorashooyinka ayaa sheegay inuu aqbalay go’aanka Maxkamadda Sare, isla markaana uu qaadi doono tallaabooyinka lagama maarmaanka u ah qabashada doorashada ku celiska ah.
Guddigu wuxuu sidoo kale sheegay inuu dib ka shaacin doono jadwalka iyo xilliga rasmiga ah ee doorashada cusub, si loo saxo khaladaadkii hore ee ay cabashooyinka ka keeneen qaar ka mid ah ururradii siyaasadeed ee ka qeyb galay doorashada.
Go’aanka Maxkamadda Sare ayaa saameyn weyn ku yeeshay xaaladda siyaasadeed ee Galmudug, iyadoo uu kusoo aaday xilli dalka uu wajahayo marxalad siyaasadeed oo xasaasi ah.
Waxaa hadda la sugayaa jadwalka cusub ee Guddiga Doorashooyinka iyo sida ay dhinacyada siyaasadeed ee Galmudug uga falcelin doonaan doorashada dib loogu laabayo.
