Wararka24: Guddoomiyaha Golaha Shacabka ee Baarlamaanka Federaalka Soomaaliya, Cabdiqaadir Maxamed Nuur, ayaa ku dhawaaqay in la laalay mooshinkii la xiriirtay la-xisaabtanka Wasiirka Arrimaha Gudaha, Federaalka iyo Dib-u-heshiisiinta, Cali Xoosh.
Guddoomiyaha ayaa sheegay in go’aanka lagu laalay soo jeedinta uu yimid kadib markii la hubiyay saxiixyada xildhibaanada ku lifaaqnaa qoraalka. Sida uu sheegay, qaar ka mid ah xildhibaanadii magacyadooda iyo saxiixyadooda lagu daray soo jeedinta ayaa caddeeyay inaysan qayb ka ahayn.
Cabdiqaadir Maxamed Nuur ayaa xusay in Qodobka 75-aad ee Xeer-hoosaadka Golaha Shacabka uu dhigayo in soo jeedin noocan ah ay noqoto mid qoraal ah oo ay saxiixaan tirada xildhibaanada uu xeerku dhigayo.
Waxa uu sheegay in Guddoonka Golaha Shacabka uu awood u leeyahay inuu soo celiyo ama laalo soo jeedin aan buuxin shuruudaha iyo habraacyada uu dhigayo Xeer-hoosaadka Baarlamaanka.
“Markuu hubiyay habraacyada iyo sax ahaanshaha saxiixyada ku lifaaqan soo jeedinta, markay u caddaatay in qaar ka mid ah xildhibaanada magacyadooda iyo saxiixyadooda ku xusan ay caddeeyeen in aysan qayb ka ahayn soo jeedinta, wuxuu go’aamiyay in la laalo soo jeedinta,” ayuu yiri Guddoomiyaha Golaha Shacabka.
Soo jeedinta ayaa la xiriirtay in Wasiirka Arrimaha Gudaha, Federaalka iyo Dib-u-heshiisiinta la horgeeyo Golaha Shacabka si wax looga weydiiyo arrimo ku saabsan waajibaadka wasaaradda iyo shaqada Xukuumadda.
Guddoomiyaha ayaa dhinaca kale caddeeyay in go’aanka lagu laalay soo jeedintan uusan meesha ka saareyn xaqa dastuuriga ah ee xildhibaanada u oggolaanaya inay soo gudbiyaan soo jeedin cusub oo la xiriirta la-xisaabtanka Xukuumadda.
Waxa uu sheegay in soo jeedin cusub la keeni karo haddii ay buuxiso shuruudaha Dastuurka iyo Xeer-hoosaadka Golaha Shacabka, oo ay ku jiraan sax ahaanshaha saxiixyada xildhibaanada taageeraya.
Go’aanka Guddoonka ayaa sidaas ku soo afjaray soo jeedintii hadda taallay Golaha Shacabka, iyadoo xildhibaanada doonaya la-xisaabtanka Wasiirka ama Xukuumadda ay weli haystaan fursad ay ku soo gudbin karaan soo jeedin cusub oo waafaqsan habraacyada baarlamaanka.
