Wararka24: Dowladda Federaalka Soomaaliya ayaa bandow habeenkii ah ka dhaqan gelisay magaalada Baydhaba ee xarunta KMG ah ee Koonfur Galbeed.
Bandowgan ayaa lagu xaddiday dhaqdhaqaaqa shacabka inta lagu jiro saacadaha habeenkii, iyadoo lagu sheegay in uu yahay mid lagu xoojinayo amniga iyo xasilloonida magaalada.
Sidoo kale, Taliska Ciidanka Booliska Soomaaliyeed ayaa mamnuucay in hub lagu dhex qaato gudaha Baydhaba, marka laga reebo ciidamada ammaanka sida Booliska iyo NISA.
Go’aankan ayaa yimid kadib markii ay sare u kaceen walaacyada amni ee la xiriira isbeddelladii siyaasadeed ee ka dhacay Koonfur Galbeed.
Taliyaha Ciidanka Booliska Soomaaliyeed Sarreeye Guuto Asad Cismaan Cabdullaahi ayaa faray saraakiisha in si adag loo dhaqan geliyo awaamiirta cusub ee amniga.
Wuxuu sidoo kale sheegay in tallaabo sharci ah laga qaadi doono cid kasta oo lagu helo inay jebiso amarka bandowga ama ay hub ku dhex qaadato magaalada.
Ciidamada ammaanka ayaa la faray inay kordhiyaan roondooyinka habeenkii, isla markaana ay xoojiyaan baaritaanka dadka iyo gaadiidka soo galaya ama ka baxaya Baydhaba.
