Wararka24: Wasiirka Arrimaha Gudaha, Federaalka iyo Dib u Heshiisiinta Soomaaliya, Cali Yuusuf Cali Xoosh, ayaa shaaciyay in doorashada guddoomiyeyaasha degmooyinka Gobolka Banaadir ay si rasmi ah u bilaaban doonto kadib munaasabadda Ciidul-Adxa.
Wasiirka ayaa hadalkan ka jeediyay munaasabad tababar loogu qabtay xubnaha cusub ee golayaasha deegaanka, isagoo sheegay in tallaabadan ay qeyb ka tahay dadaallada lagu dhameystirayo nidaamka dowladaha hoose iyo xoojinta hannaanka dimuqraadiyadda ee dalka.
Cali Xoosh ayaa sheegay in xubnaha golayaasha deegaanka ay dooran doonaan guddoomiyeyaasha degmooyinka iyo ku xigeennadooda marka la soo gabagabeeyo tababarrada hadda socda. Wuxuu xusay in geeddi-socodkan uu muhiim u yahay kor u qaadista isla xisaabtanka iyo maamulka ku saleysan matalaadda shacabka.
Wasiirka ayaa sidoo kale tilmaamay in tababarrada la siinayo xubnaha golayaasha deegaanka aysan ku koobnaan doonin aqoon-isweydaarsiyada hadda socda, balse ay jiri doonaan barnaamijyo dheeraad ah oo ku saabsan maamulka degmooyinka, qorsheynta horumarinta, adeegyada bulshada iyo habraacyada sharci dejinta.
Dowladda Federaalka Soomaaliya ayaa muddooyinkii dambe waday dadaallo lagu xoojinayo nidaamka dowladaha hoose, iyadoo Gobolka Banaadir uu ka mid yahay meelaha mudnaanta la siinayo hirgelinta maamul deegaan oo shacabka ka qeyb qaataan.
Mas’uuliyiinta dowladda ayaa aaminsan in doorashooyinka heer degmo ay gacan ka geysan doonaan xoojinta maamulka deegaanka, horumarinta adeegyada bulshada iyo kobcinta ka qeybgalka shacabka ee arrimaha dowladnimada.
Tallaabadan ayaa kusoo aadeysa xilli ay socdaan qorshayaal lagu ballaarinayo hannaanka doorashooyinka iyo maamulka deegaanka, iyadoo la filayo in doorashada hoggaanka degmooyinka Banaadir ay noqoto marxalad muhiim ah oo lagu hormarinayo dowladnimada hoose ee caasimadda.
