Wararka24: Madaxweynaha Dowlad Goboleedka Puntland, Siciid Cabdullaahi Deni, ayaa ku amray ciidamada Puntland inay galaan heegan buuxa, isla markaana u diyaar garoobaan dagaal uu ku sheegay mid lagu difaacayo shacabka iyo dhulka.
Deni ayaa hadalkan jeediyay kadib kulan uu la yeeshay saraakiil iyo cutubyo ka tirsan ciidamada, isagoo xusay in aan la siin doonin amarro khaldan, balse laga filayo inay si hufan u gutaan waajibaadkooda.
Wuxuu carrabka ku adkeeyay in Puntland ay ka go’an tahay ilaalinta amniga iyo xasilloonida, isagoo ka digay khataro ay ka mid yihiin argagixiso, burcad-badeed iyo isku dayo lagu wiiqayo ciidamada.
Madaxweynaha ayaa sidoo kale muujiyay kalsooni uu ku qabo ciidamadiisa, isagoo sheegay inay awood u leeyihiin difaaca Puntland iyo ka hortagga cid kasta oo amniga khalkhal gelisa.
“Waxaan ku kalsoonahay in ciidamadeennu ay difaaci karaan dalkooda,” ayuu yiri Deni.
Hadalka Deni ayaa kusoo aadaya xilli ay jiraan cabashooyin ka dhex jira qaar kamid ah ciidamada, kuwaas oo la xiriira arrimo ku saabsan awood qaybsiga siyaasadeed iyo mushaaraad.
DAAWA
