Wararka24: Madaxweynaha Jamhuuriyadda Federaalka Soomaaliya Xasan Sheekh Maxamuud ayaa sheegay in dowladda federaalka aysan aqbali doonin in Israa’iil ay saldhig ama saameyn siyaasadeed ku yeelato dhulka Soomaaliya, isaga oo xusay in mowqifka Soomaaliya uu waafaqsan yahay taageerada ay u hayso qadiyadda Falastiin.
Madaxweynaha ayaa hadalkan ka jeediyay munaasabad lagu xusayay Kowda Luulyo, isagoo ka hadlay wararka la xiriira xiriirka sii xoogeysanaya ee u dhexeeya Somaliland iyo Israa’iil. Wuxuu sheegay in dhaqanka, diinta iyo taariikhda Soomaalida aysan oggolaaneyn in Israa’iil ay saameyn kulahata somaaliya.
“Annaga iyo Israel waxba nagama dhexeeyaan. Israel laguma aqoon geyiga Soomaaliyeed, mana joogeyso haddii Alle yiraahdo,” ayuu yiri Madaxweyne Xasan Sheekh Maxamuud.
Madaxweynaha ayaa sidoo kale ugu baaqay shacabka Somaliland in la xoojiyo wada-hadallada iyo isfahamka, isaga oo tilmaamay in dadka Somaliland ay yihiin walaalo Soomaaliyeed oo ay tahay in khilaafaadka jira lagu xalliyo hannaan siyaasadeed iyo wadahadal.
Xasan Sheekh ayaa sheegay in dowladda federaalka ay sii wadi doonto dadaallada lagu ilaalinayo midnimada dalka iyo mowqifka Soomaaliya ee arrimaha dibadda, isaga oo carrabka ku adkeeyay in aan la aqbali doonin tallaabo kasta oo wax u dhimaysa madaxbannaanida iyo midnimada qaranka.
Hadallada madaxweynaha ayaa imanaya xilli ay jiraan dooddo ku saabsan xiriirrada diblomaasiyadeed ee Somaliland la yeelan karto dalal kale. Dowladda Federaalka Soomaaliya ayaa horey u sheegtay in aysan aqoonsaneyn heshiisyo ama xiriirro diblomaasiyadeed oo ay Somaliland la gasho dowlado shisheeye.
Soomaaliya ayaa muddo dheer taageero u muujinaysay shacabka Falastiin, iyadoo mowqifkeeda diblomaasiyadeed uu salka ku hayo taageerada xal nabadeed oo ku dhisan qawaaniinta caalamiga ah iyo xaqa shacabka Falastiin ay u leeyihiin dowlad madax-bannaan.
Illaa hadda ma jiro war rasmi ah oo ka soo baxay dhinaca Somaliland oo ku saabsan hadallada ugu dambeeyay ee Madaxweynaha Soomaaliya ee la xiriira xiriirka lagu sheegay inuu kala dhexeeyo Israa’iil.
