Wararka24: Madaxweynaha Somaliland, Cabdiraxmaan Maxamed Cabdullaahi Cirro, ayaa farriin culus u diray Dowladda Federaalka Soomaaliya iyo dowladda Djibouti, isaga oo ku eedeeyay inay faragelin ku hayaan arrimaha Somaliland.
Cirro oo ka hadlay munaasabadda Eid al-Adha ayaa sheegay in Somaliland aysan cidna ku xadgudbin, balse ay wajahday cadaadis iyo waxa uu ku tilmaamay cadaawad kaga timid dalal dhowr ah.
“Waxaad ka war qabtaan in dalal badan ay Somaliland u muujiyeen cadaawad, laakiin innagu waxba uma aynaan gaysan,” ayuu yiri Madaxweyne Cirro.
Madaxweynaha Somaliland ayaa sheegay in siyaasadda arrimaha dibadda ee Somaliland ay ku dhisan tahay daris wanaag, nabad ku wada noolaasho iyo is-ixtiraam, gaar ahaan xiriirka ay la leedahay Soomaaliya iyo Jabuuti.
“Waxaan u sheegayaa inay ixtiraamaan nabadda, daris wanaagga iyo ixtiraamka dowladaha jaarka,” ayuu yiri.
Cirro ayaa sidoo kale si toos ah farriin ugu diray Madaxweynaha Soomaaliya, Xassan Sheekh Maxamud, isaga oo sheegay in Somaliland aysan hadda kali ku ahayn loollanka siyaasadeed iyo mid diblomaasiyadeed ee gobolka.
“Xasan Sheekh waxaan leeyahay haddii aad dowlado kale noo soo kaxaysataan, Somaliland kali ma aha. Idinkana waanu isaga kiin filanahay,” ayuu yiri Cirro.
Hadalladan ayaa kusoo aadaya xilli ay sii kordhayaan xiisadaha diblomaasiyadeed ee u dhexeeya Somaliland iyo Dowladda Federaalka Soomaaliya, gaar ahaan kadib qorshaha Somaliland ee ku aaddan xiriirka ay la sameyneyso Israa’iil iyo hadallada la xiriira furitaanka safaarad laga hirgelinayo magaalada Qudus.
Madaxweyne Xasan Sheekh ayaa shalay si adag uga hadlay tallaabadaas, isaga oo sheegay in aan la aqbali karin in qayb kamid ah Soomaaliya ay xiriir noocaas ah la sameyso Israa’iil, gaar ahaan arrimaha la xiriira magaalada Qudus.
Xiisaddan cusub ayaa imaneysa xilli Somaliland ay dardar gelisay dadaallada ay ku raadineyso aqoonsi caalami ah, halka Dowladda Federaalka Soomaaliya ay ku adkeysaneyso ilaalinta midnimada iyo wadajirka dhuleed ee dalka.
