Wararka24: Axmed Shide ayaa loo doortay Guddoomiyaha Golaha Wakiillada Shacabka Itoobiya, isagoo noqday Soomaaligii ugu horreeyay ee qabta xilka hoggaaminta aqalka hoose ee Baarlamaanka Federaalka Itoobiya. Doorashadiisa ayaa dhacday 5-tii Oktoobar 2026, xilli uu magaalada Addis Ababa ka furmay kalfadhiga ugu horreeya ee Baarlamaanka 7-aad.

Golaha Wakiillada Shacabka ayaa Axmed Shide si wadajir ah ugu doortay guddoomiye, iyadoo isla kalfadhiga lagu dhisay hoggaanka cusub ee baarlamaanka. Ayelech Eshete ayaa iyadana loo doortay guddoomiye ku-xigeenka Golaha Wakiillada Shacabka.

muxuu yahay Axmed Shide?

Axmed Shide wuxuu kasoo jeedaa Deegaanka Soomaalida Itoobiya, wuxuuna muddo dheer xilal sare kasoo qabtay dowladda federaalka. Xilalkiisii ugu dambeeyay waxaa ka mid ahaa Wasiirka Maaliyadda, waxaana sidoo kale uu horey u soo noqday Wasiirka Gaadiidka iyo xilal kale oo dowladeed.

Doorashadiisa ayaa ah markii ugu horreysay ee siyaasi Soomaali ah loo doorto Guddoomiyaha Golaha Wakiillada Shacabka, oo ah aqalka hoose ee Baarlamaanka Federaalka Itoobiya. Si kastaba, Axmed Shide ma aha Soomaaligii ugu horreeyay ee hoggaamiya mid ka mid ah labada aqal ee baarlamaanka dalka.

Aadan Faarax Ibraahim ayaa horey u noqday Guddoomiyaha Golaha Federaalka, oo ah aqalka sare ee Baarlamaanka Itoobiya. Sidaas darteed, xilka cusub ee Axmed Shide wuxuu si gaar ah uga dhigan yahay in siyaasi Soomaali ah markii ugu horreysay hoggaamiyo aqalka hoose ee baarlamaanka.

Golaha Wakiillada Shacabka wuxuu leeyahay door muhiim ah oo ku saabsan sharci-dejinta federaalka, ansixinta miisaaniyadda iyo kormeerka hay’adaha dowladda. Guddoomiyaha golaha ayaa mas’uul ka ah hoggaaminta fadhiyada iyo hawlaha baarlamaanka, taasoo xilka ka dhigaysa mid ka mid ah jagooyinka sare ee hay’adaha federaalka.

Doorashada Axmed Shide ayaa kusoo beegantay bilowga xilli cusub oo siyaasadeed oo Itoobiya ah, kaddib doorashadii guud ee 1-dii Juun 2026. Baarlamaanka cusub ayaa sidoo kale magacaabay Abiy Axmed inuu sii noqdo Ra’iisul Wasaaraha Itoobiya, waxaana uu dhaariyay xilkiisa cusub.

Dhanka kale, Golaha Federaalka ayaa Muferihat Kamil u doortay Guddoomiye, halka Desta Ledamo loo doortay ku-xigeen. Tallaabooyinkan ayaa dhammaystiray dhismaha hoggaanka labada aqal ee Baarlamaanka Itoobiya, xilli dalka uu galay muddo cusub oo shan sano ah oo siyaasadeed iyo mid hay’adeed.