Wararka25: 23-02-2026 Madaxweynaha Jubbaland, Axmed Maxamed Islaam (Axmed Madoobe), ayaa la filayaa inuu kataga Muqdisho kuna laabto Kismaayo maalinta Talaadada, kaddib markii uu hakad galay wadahadalkii u dhexeeyay Dowladda Federaalka Soomaaliya iyo Golaha Mustaqbalka.
Ilo xog-ogaal ah ayaa sheegay in go’aanka safarkiisa uu yimid xilli ay wadaxaajoodyadu mareen is-mari-waa, isla markaana aan weli wax heshiis ah laga gaarin qodobadii la isku hayay. Madaxweynaha Puntland, Siciid Cabdullaahi Deni, ayaa la sheegay inuu sii joogayo Muqdisho si uu u wado kulamo gaar ah oo ka socda xerada Xalane.
Wadahadallada ka dhacay Madaxtooyada Villa Soomaaliya ayaa ku dhammaaday natiijo la’aan, iyadoo labada dhinac ay ku kala aragti duwan yihiin nooca doorasho ee dalka laga hirgelinayo.
Dowladda Federaalka ayaa riixaysa in la hirgeliyo nidaamka doorashada qof iyo cod, halka Golaha Mustaqbalka ay ku adkeysanayaan in la sii wado hannaan doorasho dadban oo lagu heshiiyay.
Khilaafkan ayaa sii adkeeyay jawiga siyaasadeed ee dalka, waxaana la filayaa in Golaha Mustaqbalka ay maanta qabtaan shir jaraa’id oo ay ku faahfaahinayaan sababaha keenay fashilka wadahadalladii ka dhacay Villa Soomaaliya.
