LONDON-WARARKA24: Tababaraha kooxda Arsenal, Mikel Arteta, ayaa si weyn uga helay qaab ciyaareedkii wiilka da’da yar ee Max Dowman, oo 15 jir ah, balse wuxuu sheegay in uusan weli caddayn inta daqiiqo ee uu heli doono xilli ciyaareedkan soo socda.
Dowman, oo ka ciyaara garabka dhexe, wuxuu kamid ahaa laba ciyaartoy oo 15 jir ah oo kulankoodii ugu horreeyay ee kooxda koowaad u saftay kulankii ay 1-0 kaga badiyeen AC Milan. Ciyaaryahanka kale wuxuu ahaa mid ka ciyaara daafaca dhexe Marli Salmon, balse Dowman ayaa si gaar ah indhaha caalamka u soo jiitay, isagoo xitaa marar badan ku dhowaaday inuu dhaliyo goolal.
“Waxaa aad iiga farxiyay dhammaan ciyaartoyda dhalinyarada ah,” ayuu yiri Arteta mar la weydiiyay Dowman.
“Waxay la ciyaari karaan ciyaartoy waweyn, inkastoo oo ay yihiin 15 jirar, sababtoo ah jawiga iyo dhaqanka kooxdu waa mid aad u taageera iyaga, waxa aana rabaa markasta in ay dareemaan kalsooni buuxda. ayuu yidhi
“Si kastaba, waxa muhiim ah in ciyaartoygu uu lahaado tayo dabii ah ee wiilkan uu leeyahay.”
Marka la eego fursadaha uu Dowman heli karo xilli ciyaareedkan, Arteta wuxuu sheegay: “Weli lama ogo. Dhammaan ciyaartoyda da’da yar waxay si joogto ah ula tacaamulaan kooxda koowaad, wayna la qabsadeen qaabka iyo baahiyaha kooxdu leedahay.”
“Laakiin si ay u ciyaaraan heerkaas, waa in heerka jirkoodu uu noqdo mid aad u sarreeya, waana halka ay hadda ku wajahan yihiin. Marka la gaaro heerkaas, waxay u baahan yihiin inay si dhab ah ay u kasbadaan boosaskooda.” XIGASHO sky sport
