NEWCASTLE –WARARKA24: Weeraryahanka xulka Sweden iyo kooxda Newcastle United, Alexander Isak, ayaa ka mid noqon doonin ciyaartoyda u safreysa Singapore iyo Koonfur Korea, kadib dhaawac fudud oo kasoo gaaray bowdada.
Kooxda Newcastle ayaa xaqiijisay in maqnaanshihiisa uu sabab u yahay dhaawac yar, inkasta oo taageerayaashu ay durba ka walaacsan yihiin xaaladdiisa, maadaama uu horey uga maqnaa guuldarradii 4-0 ahayd ee ka soo gaartay kooxda Celtic kulankii ugu horeeyay ee isku diyaarinta xilli ciyaareedka cusub.
Isak, oo bartilmaameedka koobaad u ahaa kooxda Liverpool xagaagan, ayaa maqnaanshihiisu ku soo beegmay xilli Liverpool ay haatan diiradda saartay weeraryahanka kale Hugo Ekitike, iyadoo ay kula soo wareegtay heshiis gaaraya ilaa £79m.
Newcastle ayaa shaacisay liiska ciyaartoyda kooxda koowaad ee u ambabaxay safarka Asia, halkaas oo ay Axadda ku wajahayaan Arsenal magaalada Singapore. Kadibna waxay kasii aadi doonaan Koonfur Korea si ay ula ciyaaraan kooxda xiddigaha K-League iyo Tottenham Hotspur.
Tababare Eddie Howe ayaa haysta koox buuxda oo diyaar ah marka laga reebo Isak, halka Lewis Hall uu kasoo laabtay dhaawac waxaana la filayaa inuu qeyb ka noqdo kulamada Koonfur Korea. sida lagu shaaciyay barta X oo hore looga yaqiinay (Twitter)
