Wararka24: Dowladda Federaalka Soomaaliya ayaa xirtay sarkaal ka tirsan ciidamada, kaas oo lagu eedeeyay inuu tacaddi u geystay maxbuus ka tirsanaa Al-Shabaab, kaddib markii muuqaal muujinaya falkaasi lagu faafiyay baraha bulshada. Wasiirka Gaashaandhigga Soomaaliya, Axmed Macallin Fiqi, ayaa sheegay in sarkaalka la qabtay saacado gudahood markii muuqaalka la baahiyay.
Wasiirka ayaa sheegay in sarkaalka hadda wajahayo tallaabo sharci ah, isla markaana maxkamad la horgeyn doono. Wuxuu tilmaamay in dowladda aysan oggolayn in qof maxbuus ah, xitaa haddii uu ka tirsan yahay koox hubeysan, loo geysto jirdil ama fal ka baxsan sharciga.
“Shabaab oo xabbad wata, dadka dilaya oo dadkeenna dhibaateynaya, waxaan oggolnahay in sharciga hortiisa la keeno,” ayuu yiri Fiqi. Wuxuu intaas ku daray in aan loo bannaanayn in maxbuus lagu ciqaabo ama lagu dhibaateeyo qaab wax u dhimaya karaamadiisa iyo xuquuqdiisa.
Wasiirka ayaa sheegay in dhacdadan ay dowladda ka qaadday tallaabo degdeg ah, kadib markii muuqaalka falka uu soo galay baraha bulshada. Sida uu sheegay, sarkaalka ayaa la qabtay saacado kaddib, iyadoo dowladda ay qorsheyneyso in kiiska loo gudbiyo maxkamadda si waafaqsan sharciga.
Dhanka kale, Fiqi ayaa sheegay in dowladda ay waddo dadaallo lagu xoojinayo ilaalinta dadka rayidka ah xilliyada ay ciidamada fulinayaan howlgallada milatari. Wuxuu xusay in arrintan ay si gaar ah muhiim uga tahay deegaannada ay ka socdaan dagaallada lagula jiro kooxaha hubeysan.
Wasiirka ayaa tusaale u soo qaatay howlgallo dhawaan ka dhacay gobolka Shabeellaha Hoose, kuwaas oo uu sheegay inay waxyeello kasoo gaartay qaar ka mid ah beeraha. Wuxuu sheegay in ciidamada looga baahan yahay inay ilaaliyaan shacabka iyo hantidooda, oo ay ku jiraan beeraha iyo guryaha.
“Waxaan ka hadlaynaa in dhirta la ilaaliyo, beeraha iyo hantida dadka la ilaaliyo, laakiin waxa intaas ka horreeya waa in insaanka la ilaaliyo,” ayuu yiri wasiirka.
Dowladda ayaa sheegtay inay arrimaha ilaalinta rayidka iska kaashanayaan hay’adaha dowladda, ciidamada iyo hay’adaha caalamiga ah. Sida uu wasiirku sheegay, waxaa la sameeyay hannaan wada shaqeyn ah oo lagu xoojinayo ilaalinta dadka rayidka ah iyo dhowrista xuquuqda aadanaha xilliyada colaadaha.
