Wararka24: Ciidamo ka tirsan xoogga dalka Soomaaliyeed ayaa tababar ciidan uga socda xero ku taalla degmada Waajid ee gobolka Bakool, iyadoo la qorsheynayo inay ka qeyb qaataan howl-gallada amni ee ka socda deegaannada Koonfur Galbeed.
Ciidamadan ayaa lagu diyaarinayaa hawlo militari oo ka dhan ah Al-Shabaab, iyadoo tababarkoodu qeyb ka yahay qorshaha dowladda Federaalka Soomaaliya ee lagu xoojinayo awoodda ciidamada qaranka ee ka howlgala koonfurta iyo bartamaha dalka.
Saraakiil ka tirsan xoogga dalka ayaa gaaray xerada tababarka, halkaas oo ay kormeer ku sameeyeen habka loo tababarayo ciidamada iyo goobaha ay askartu ku qaadanayaan casharrada militari.
Saraakiisha ayaa sidoo kale warbixinno ka dhageystay macallimiinta iyo tababarayaasha mas’uulka ka ah ciidamada. Waxay xog ka heleen heerka ay marayaan tababarka iyo diyaarinta cutubyada cusub.
Tababarkan ayaa kusoo beegmaya xilli dowladda Federaalka ay xoogga saareyso dhismaha iyo tayeynta ciidamada qaranka, si ay si buuxda ugu diyaar garoobaan qaadista mas’uuliyadda amniga dalka.
Qorshahan ayaa sidoo kale qeyb ka ah marxaladda kala-guurka amniga Soomaaliya, iyadoo ciidamada Midowga Afrika ee AUSSOM ay si tartiib ah ciidamada Soomaaliyeed ugu wareejinayaan mas’uuliyadda amniga goobaha ay hadda ka howlgalaan.
Dowladda ayaa horey u qaaday tallaabooyin lagu diyaarinayo cutubyo cusub oo ka tirsan xoogga dalka. Madaxweynaha Soomaaliya Xasan Sheekh Maxamuud ayaa bishan tababar ugu soo xiray ciidamo lagu soo tababaray deegaanka Xananbuure ee gobolka Galgaduud, kuwaas oo loogu talagalay xoojinta howl-gallada amniga.
