Wararka24: Muwaadiniin Soomaali ah oo ku xiran xarumaha lagu hayo dadka wajahaya dib-u-celinta ee dalka Sweden ayaa dowladda Soomaaliya ka codsaday inay wax ka qabato xaaladdooda, iyagoo sheegay inay muddo dheer xiran yihiin isla markaana ay ka cabsi qabaan in si khasab ah loogu celiyo Soomaaliya.
Qaar ka mid ah dadka la xiray ayaa sheegay in codsiyadoodii magangelyo la diiday, balse ay weli ku jiraan xarumaha dib-u-celinta iyagoo aan si cad loo ogeysiin halka ay xaaladdoodu ku dambeyn doonto. Waxay dowladda Soomaaliya ka dalbadeen inay la xiriirto dowladda Sweden oo ay wax ka qabato xaaladdooda.
Masra Maxamed oo ka mid ah haweenka ku xiran Sweden ayaa sheegtay inay muddo ku dhow hal sano ku jirtay xarumaha xabsiga iyo kuwa dib-u-celinta. Waxay sheegtay in markii codsigeedii magangelyo la diiday ay codsatay in haddii aysan Sweden sii joogi karin loo fududeeyo inay si sharci ah Soomaaliya ugu laabato.
Masra ayaa sidoo kale sheegtay inay la xiriirtay safaaradda Soomaaliya, balse aysan helin xal ay ku qanacdo. Waxay intaas ku dartay in loo sheegay inay bixiso lacag haddii ay doonayso in habka looga sii daayo xarunta la dedejiyo, arrintaas oo ay sheegtay in aysan awoodin.
Muwaadin kale oo lagu magacaabo Sakariya, oo sheegay inuu Sweden ku noolaa muddo 15 sano ah, ayaa sheegay inuu hadda ku xiran yahay Stockholm, isla markaana uu ka cabsi qabo in si khasab ah loogu celiyo Soomaaliya. Wuxuu sheegay in shan carruur ah ay Sweden ugu dhasheen, ayna haystaan baasaboorka dalkaas, halka xaaskiisuna ay iyaduna haysato dhalashada Sweden.
Sakariya ayaa sheegay in Soomaalida ku jirta xarumaha dib-u-celinta ay tiradoodu gaari karto ilaa 50 qof, kuwaas oo ku kala xiran Stockholm iyo magaalooyin kale. Wuxuu sheegay in qaar ka mid ah dadkaas loo diyaarinayo dukumentiyo safar oo loogu celinayo Soomaaliya.
Wuxuu sidoo kale eedeymo u jeediyay safaaradda Soomaaliya ee Sweden, isagoo sheegay in dukumentiyo loogu diyaariyay qaar ka mid ah dadka la doonayo in la celiyo iyada oo aan si toos ah loola kulmin. Eedeymahaas ayaa ku saleysan hadalladiisa, mana jirto jawaab rasmi ah oo safaaradda Soomaaliya ka bixisay.
Dadka ku xiran xarumaha dib-u-celinta ayaa ugu dambeyn madaxweynaha Soomaaliya, ra’iisul wasaaraha iyo mas’uuliyiinta kale ee dowladda ugu baaqay inay si degdeg ah u eegaan xaaladdooda, isla markaana ay dowladda Sweden kala hadlaan dadka wajahaya dib-u-celinta iyo saameynta ay arrintu ku yeelan karto qoysaska Soomaalida ah ee ku nool dalkaas.
