Wararka24: Xiisadda u dhexeysa Israa’iil iyo Turkiga ayaa sii xoogeysatay kadib markii duqeymo Israa’iil loo nisbeeyay lagu bartilmaameedsaday saldhigga Abu al-Duhur ee gobolka Idlib, waqooyi-galbeed Suuriya. Weerarka ayaa sababay burbur soo gaaray runway-ga iyo xarumaha saldhigga, balse lama soo sheegin khasaaro nafeed.
Wararka laga helay dhinacyada ayaa sheegaya in siddeed duqeyn ay ku dhaceen saldhigga, kaas oo ku yaalla qiyaastii 70 kiiloomitir xadka Turkiga. Israa’iil ayaa sheegtay in tallaabadaasi la xiriirtay walaac laga qabo in ciidamo Turki ah la geeyo saldhigga, taas oo ay u aragto arrin amni oo xasaasi ah.
Dhanka kale, Turkiga ayaa cambaareeyay duqeynta, isagoo diiday in saldhigga loo qorsheeyay joogitaan ciidan oo Turki ah. Ankara waxay sheegtay inay sii wadi doonto taageerada ay siiso Suuriya, gaar ahaan dhinacyada tababarka iyo iskaashiga milatari.
Mas’uuliyiin Suuriyaan ah ayaa sheegay in wafdi Turki ah uu booqday saldhigga maalintii ka horreysay weerarka, si uu u qiimeeyo shaqooyin dib loogu dayactirayay xarunta. Si kastaba, dowladda Suuriya waxay ku adkaysatay in aysan jirin qorshe lagu dhisayo saldhig Turki ah oo joogto ah halkaasi.
Wasiirka Difaaca Israa’iil, Israel Katz, ayaa digniin u diray Madaxweynaha Turkiga Recep Tayyip Erdogan, isagoo ku eedeeyay inuu Turkiga u horseedayo xaalado khatar ah gudaha Suuriya. Ankara ayaa hadalladaas iyo duqeynta ku tilmaantay tallaabooyin aan sharci ahayn oo wax u dhimaya madax-bannaanida Suuriya.
Dowladda Mareykanka ayaa iyaduna muujisay walaac ku saabsan dhacdada. Ergeyga gaarka ah ee Mareykanka u qaabilsan Suuriya, Tom Barrack, ayaa sheegay in weerarku ahaa “koror xiisadeed aan loo baahnayn”, isagoo xusay in Turkiga aan horay loogu wargelin duqeynta.
Barrack ayaa sheegay in Washington ay ka shaqaynayso hannaan lagu yareynayo khatarta iska horimaad toos ah oo dhex mara Israa’iil, Turkiga iyo Suuriya. Wuxuu sidoo kale sheegay in xiriirro joogto ah oo dhinacyadu yeeshaan ay muhiim u yihiin ka hortagga xaaladdu inay sii xumaato.
Dhacdadan ayaa kusoo beegmaysa xilli Turkiga uu sii ballaarinayo iskaashiga uu la leeyahay dowladda cusub ee Suuriya, halka Israa’iil ay si dhow ula socoto kobaca awoodda milatari ee Dimishiq iyo doorka Ankara ee dalkaas. Tani waxay sii adkeyn kartaa loollanka labada dal ee ku saabsan mustaqbalka siyaasadeed iyo amni ee Suuriya
