Wararka24: Guddiga Madaxa-bannaan ee Doorashooyinka Qaranka iyo Soohdimaha ayaa ku dhawaaqay in muddo kooban dib loo dhigay doorashada isku sidkan ee Golaha Wakiillada iyo Golayaasha Deegaanka ee Hirshabeelle. Doorashada ayaa markii hore loo qorsheeyay inay dhacdo 20-ka Agoosto 2026.
Guddiga ayaa sheegay in dib-u-dhaca loo sameeyay si loo dhammeystiro hawlaha muhiimka ah ee doorashada, isagoo wargeliyay dhammaan daneeyayaasha iyo shacabka Soomaaliyeed. Guddigu ma uusan shaacin taariikh cusub oo rasmi ah oo doorashadu qabsoomi doonto.
Sababaha dib-u-dhaca waxaa ka mid ah diiwaangelinta cod-bixiyeyaasha oo weli ka socota afar degmo oo ka tirsan gobolka Hiiraan. Guddiga ayaa sheegay in hawshaas loo baahan yahay in la dhammeystiro ka hor inta aan la guda gelin doorashada.
Qodobka labaad ee sababay dib-u-dhaca ayaa ah in ururrada siyaasadda loo baahan yahay in la siiyo waqti ay ku abaabulaan taageerayaashooda, si ay si buuxda uga qayb qaataan hannaanka doorashada. Guddigu wuxuu sidoo kale sheegay in ururrada siyaasadda loo baahan yahay inay helaan fursad ay ku soo gudbiyaan liisaska musharraxiintooda.
Guddiga Doorashooyinka ayaa sheegay inuu muddo laba toddobaad gudahood ah ku shaacin doono jadwalka cusub ee doorashada. Jadwalkaasi ayaa lagu caddeyn doonaa taariikhda rasmiga ah ee doorashada Golaha Wakiillada iyo Golayaasha Deegaanka Hirshabeelle.
Dib-u-dhaca doorashada ayaa kusoo beegmaya xilli uu Hirshabeelle ka jiro loollan siyaasadeed oo ku saabsan hoggaanka maamulka. Qaar ka mid ah siyaasiyiinta iyo bulshada gobolka Hiiraan ayaa muddooyinkii dambe soo bandhigay tabashooyin la xiriira awood-qaybsiga iyo hoggaanka maamulka.
Madaxweyne Cali Guudlaawe iyo siyaasiyiin taageersan ayaa sidoo kale doonaya inay sii wataan hoggaanka Hirshabeelle, halka dhinacyo kale ay wadaan olole siyaasadeed oo ay ku doonayaan isbeddel hoggaamineed. Loollanka ayaa sare u qaaday muhiimadda ay doorashadu u leedahay mustaqbalka maamulka.
Doorashada Hirshabeelle ayaa si gaar ah isha loogu hayaa, iyadoo natiijadeeda iyo hannaanka loo qabanayo ay saameyn ku yeelan karaan xiriirka siyaasadeed ee u dhexeeya dowladda Federaalka, maamulka Hirshabeelle iyo dhinacyada siyaasadeed ee deegaanka.
