Wararka24: Madaxweynaha Soomaaliya Xasan Sheekh Maxamuud ayaa gaaray magaalada Galinsoor ee gobolka Galgaduud, isagoo halkaas uga sii gudbaya magaalada Gaalkacyo ee gobolka Mudug. Madaxweynaha ayaa safar ku maraya deegaannada Galmudug, iyadoo ujeeddada booqashadiisu ay tahay inuu ku kuur galo xaaladaha amni iyo nololeed ee bulshada.
Xasan Sheekh waxaa safarka ku wehliya Madaxweynaha Galmudug Axmed Cabdi Kaariye Qoor Qoor, waxaana magaalada Galinsoor kusoo dhaweeyay boqolaal qof oo shacabka deegaanka ah. Dadka ayaa safaf dhaadheer u galay soo dhoweynta Madaxweynaha iyo wafdigiisa, iyadoo booqashadu ay ahayd mid si weyn looga dareemay magaalada.
Madaxweynaha ayaa kulan uu bulshada kula yeeshay goob fagaare ah ugu baaqay dadka reer Galinsoor inay xoogga saaraan ilaalinta nabadda, xasilloonida iyo wada noolaanshaha bulshada. Wuxuu sidoo kale adkeeyay muhiimadda ay leedahay in magaalada ay noqoto deegaan ay si nabad ah ugu wada nool yihiin dadka Soomaaliyeed ee deegaanka wada dega.
Xasan Sheekh ayaa xalay ku hoyday magaalada Cadaado, halkaas oo gelinkii dambe ee shalay si weyn loogu soo dhaweeyay. Madaxweynaha ayaa halkaas uga soo baxay Dhuusamareeb, caasimadda Galmudug, isagoo safarkiisa ku maraya dhulka.
Socdaalka Madaxweynaha ayaa kusoo beegmaya xilli uu sare u kacay khilaafka siyaasadeed iyo amni ee u dhexeeya dowladda Federaalka iyo Puntland, gaar ahaan gobolka Mudug. Puntland ayaa maalmo kahor digniin kasoo saartay qorshaha booqashada Xasan Sheekh ee Gaalkacyo, iyadoo walaac ka muujisay saameynta ay safarku ku yeelan karto xaaladda magaalada.
Dowladda Federaalka ayaa horey u sheegtay in Madaxweynaha uu booqan doono koonfurta Gaalkacyo oo ka tirsan Galmudug. Wasiirka Gaashaandhigga Soomaaliya Axmed Macallin Fiqi ayaa sidoo kale sheegay in safarka Madaxweynaha uu qorshaysan yahay, isagoo diiday digniinta Puntland.
Xiisadda labada dhinac ayaa sii xoogeysatay kadib dhacdooyin amni oo dhawaan ka dhacay Gaalkacyo iyo deegaannada ku dhow. Iska-horimaadyada iyo dhaq-dhaqaaqyada ciidamada ayaa sare u qaaday walaaca laga qabo in khilaafka siyaasadeed ee Muqdisho iyo Garoowe uu isu beddelo loollan amni.
Safarka Xasan Sheekh ee Gaalkacyo ayaa sidaas kusoo aadaya xilli xaaladda gobolka Mudug si dhow loo eegayo. Waxaa la sugayaa tallaabooyinka uu Madaxweynaha qaadi doono iyo saameynta booqashadiisu ku yeelan karto xiisadda u dhexeysa dowladda Federaalka iyo Puntland.
