Wararka24: Maamulka Puntland ayaa ku eedeeyay Dowlad-goboleedka Galmudug inuu dowladda Federaalka Soomaaliya kala shaqeynayo joogitaanka maleeshiyaad iyo saanad ciidan oo, sida ay sheegtay, loo adeegsanayo in lagu waxyeelleeyo amniga iyo shacabka Puntland.
War-saxaafadeed ay soo saartay Puntland ayaa lagu sheegay in Galmudug looga baahan yahay inay ka waantoowdo arrimahaas, isla markaana ay xoogga saarto xoojinta deris-wanaagga, iskaashiga amniga iyo nabadgelyada oo ay sheegtay inay muddo dheer ka dhexeeyeen labada maamul.
Puntland waxay sheegtay inay Galmudug ugu baaqeyso in aan loo oggolaan garoomada diyaaradaha iyo dhulka ay maamusho inay maraan saanad ciidan ama maleeshiyaad, kuwaas oo ay ku andacootay in ujeeddadoodu tahay dhibaateynta shacabka reer Puntland.
War-saxaafadeedka ayaa sidoo kale lagu sheegay in Puntland ay la socoto dhaqdhaqaaqyo ciidan oo ay ku eedeysay inay ku lug leeyihiin ciidamo ka amar qaata Dowladda Federaalka Soomaaliya iyo xubno ka tirsan PSF, kuwaas oo maamulka Puntland uu ku tilmaamay khatar amni.
Eedeymahan ayaa kusoo aadaya xilli ay sare u kacday xiisadda siyaasadeed iyo tan amni ee u dhexeysa Puntland iyo Dowladda Federaalka Soomaaliya, iyadoo ay jiraan ismaandhaafyo la xiriira arrimo amni iyo siyaasadeed.
Ilaa iyo hadda, ma jiro war rasmi ah oo ka soo baxay Dowlad-goboleedka Galmudug oo ku saabsan eedeymaha ay Puntland u jeedisay.
