Ciidamada Kumaandooska Danab ee Dowladda Federaalka Soomaaliya, oo kaashanaya ciidamada Jubbaland, ayaa sheegay inay howlgal qorsheysan ka fuliyeen deegaanno ku yaalla duleedka degmada Jilib ee gobolka Jubbada Dhexe.
Sida ay warbaahinta dowladda u sheegeen saraakiisha hoggaaminaysay howlgalka, ciidamada ayaa burburiyay toddobo fariisin oo ay Al-Shabaab ku lahayd deegaanka, waxayna gacanta ku dhigeen agab lagu sheegay in laga helay saldhigyadaas.
Saraakiisha ayaa sheegay in deegaanka Gambaale uu ka mid ahaa goobaha ugu muhiimsan ee ay Al-Shabaab ku sugnaayeen, isla markaana uu kamid ahaa bartilmaameedyadii howlgalka.
Taliska ciidamada ayaa xusay in howlgalkan uu qayb ka yahay dadaallada lagu xoojinayo amniga deegaannada Jubbaland iyo howlgallada joogtada ah ee ka dhanka ah Al-Shabaab ee ka socda gobolka Jubbada Dhexe.
Illaa iyo hadda, saraakiishu ma aysan shaacin khasaaraha ka dhashay howlgalka ee dhinaca Al-Shabaab, mana jiro war rasmi ah oo kooxda kasoo saartay sheegashada dowladda.
