Wararka24: Ciidamada sida gaarka ah u tababaran ee Kumaandooska Danab, oo kaashanaya ciidamada Daraawiishta Jubbaland, ayaa maanta howlgallo qorsheysan ka fuliyay deegaanno ka tirsan gobolka Jubbada Hoose, halkaas oo lagu beegsaday fariisimo ay Al-Shabaab ku lahayd.
Howlgallada ayaa ka dhacay deegaannada Xawaalo-afwaax, Weelmaarow iyo Lafagari, iyadoo ciidamada ay gudaha u galeen goobahaasi isla markaana ay burburiyeen godad difaac iyo xarumo ay kooxda u adeegsan jirtay abaabulka weerarrada iyo kaydinta agabka.
Saraakiisha hoggaaminaysay howlgalka ayaa sheegay in ciidamada ay gaareen ujeeddooyinkii loo qorsheeyay, isla markaana la burburiyay saldhigyo iyo difaacyo ay Al-Shabaab ka samaysatay deegaannadaasi. Dowladda ayaa sheegtay in goobaha la beegsaday ay kooxda kasoo abaabuli jirtay weerarro ka dhan ah shacabka iyo ciidamada ammaanka.
Howlgalladan ayaa qayb ka ah dadaallada ay dowladda Federaalka Soomaaliya ku xoojinayso gulufka milatari ee ka dhanka ah Al-Shabaab, kaddib amarkii Madaxweyne Xasan Sheekh Maxamuud ee la xiriiray dardargelinta howlgalada lagu beegsanayo kooxda.
Maalmihii u dambeeyay, ciidamada Danab ayaa kordhiyay howlgallada ay ka wadaan koonfurta dalka. Dowladda ayaa hore u sheegtay in howlgal ka dhacay degmada Sablaale ee gobolka Shabeellaha Hoose lagu dilay toddobo xubnood oo ka tirsanaa Al-Shabaab, halka howlgal kale oo ka dhacay deegaanka Hantiwadaag lagu dilay horjooge Cabdisalaan Macallin Abuukar, oo sida dowladda sheegtay u qaabilsanaa qorista maleeshiyaad cusub iyo uruurinta baadda ay kooxda ka qaaddo shacabka.
Dowladda Federaalka Soomaaliya ayaa sheegtay in howlgallada ka dhanka ah Al-Shabaab ay sii socon doonaan, iyadoo ciidamada ay sii wadaan beegsiga fariisimaha, xarumaha iyo horjoogayaasha kooxda ee ku sugan deegaannada ay weli ka howlgasho.
