Wararka24: Dowladda Uganda ayaa oggolaatay inay ciidamo ku biiriso howlgal caalami ah oo la qorsheynayo in laga hirgeliyo Marinka Gaza, kadib codsi uga yimid Madaxweynaha Mareykanka, Donald Trump, sida ay baahisay warbaahinta dowladda Uganda.
Wargeyska New Vision ayaa, isagoo soo xiganaya ilo ka tirsan ciidamada Uganda, sheegay in Madaxweyne Yoweri Museveni uu si wanaagsan uga jawaabay codsiga ku saabsan ka qeybgalka ciidanka caalamiga ah ee loo qorsheeyay xasilinta Gaza.
Sida wararku sheegayaan, ciidamada la qorsheynayo ayaa hoos tegi doona gole caalami ah oo loo xil saaray taageeridda xabbad-joojinta, sugidda amniga, fududeynta gaarsiinta gargaarka bani’aadannimo iyo taageeridda dib-u-dhiska Gaza.
Uganda ayaa la filayaa inay howlgalka kula biiran dalal ay ka mid yihiin Morocco, Kosovo, Albania iyo Kazakhstan, kuwaas oo la sheegay inay muujiyeen diyaar u ahaanshahooda ka qeybgalka qorshahan. Wararka ayaa sidoo kale sheegaya in saldhig dhinaca saadka ah laga dhisi doono Kerem Shalom, si loogu diyaariyo ciidamada ka hor inta aan loo gudbin gudaha Gaza.
Si kastaba ha ahaatee, dowladda Uganda iyo taliska ciidamada UPDF weli si rasmi ah uma shaacin tirada ciidamada la diri doono, nooca cutubyada ka qeybgalaya iyo waqtiga uu howlgalka bilaaban doono. Afhayeen ku xigeenka ciidamada Uganda ayaa sheegay in tallaabo kasta ay ku xirnaan doonto hagitaanka istaraatiijiga ah ee Madaxweyne Museveni.
Qorshahan ayaa daba socda dadaallada caalamiga ah ee lagu doonayo in lagu xoojiyo amniga Gaza, iyadoo howlgalka la filayo inuu door ka qaato ilaalinta dadka rayidka ah, taageeridda gargaarka bani’aadannimo iyo dib-u-soo kabashada kaabeyaasha burburay.
Uganda ayaa horey khibrad ugu lahayd howlgalada nabad-ilaalinta iyo la dagaallanka argagixisada, iyadoo muddo dheer ciidamo ku lahayd Soomaaliya iyo dalal kale oo Afrika ah. Haddii qorshahan la hirgeliyo, wuxuu noqon doonaa mid ka mid ah howlgaladii ugu ballaarnaa ee Uganda ay ka fuliso meel ka baxsan qaaradda Afrika.
