Wararka24: 19-02-2026 Safiirka Soomaaliya ee Qaramada Midoobay, Abuukar Baale, ayaa sheegay in xaaladda bani’aadamnimo ee ka jirta Marinka Gaza ay gaartay heer halis ah, iyadoo caqabado waaweyn ay hor taagan yihiin gaarsiinta gargaarka bani’aadannimo ee dadka rayidka ah.
Safiirka ayaa hadalkan ka jeediyay fadhi uu yeeshay Golaha Ammaanka ee Qaramada Midoobay, isagoo carrabka ku adkeeyay in xaaladda Gaza ay u baahan tahay tallaabo degdeg ah oo ka timaadda beesha caalamka si loo xaqiijiyo in gargaarku si nabad ah oo joogto ah u gaaro dadka ku dhibaateysan colaadda.
Abuukar Baale ayaa xusay in ilaalinta dadka rayidka ah ay tahay waajib sharci iyo mid akhlaaqeed, isla markaana dhammaan dhinacyada ay waajib ku tahay inay ixtiraamaan xeerarka caalamiga ah ee bani’aadannimada.
Safiirka Soomaaliya ayaa si cad u muujiyay mowqifka Dowladda Federaalka Soomaaliya ee ka soo horjeeda isku day kasta oo lagu barakicinayo shacabka Falastiiniyiinta ama si khasab ah loogu raro dalal kale, isagoo xusay in tallaabo kasta oo noocaas ah ay jebinayso shuruucda caalamiga ah iyo xuquuqda aadanaha.
Wuxuu sheegay in xal waara uusan ku jirin barakicin ama beddelidda qaab-dhismeedka dadweynaha, balse uu ku jiro in la wajaho asalka khilaafka lana xaqiijiyo xuquuqda sharciga ah ee shacabka Falastiin, gaar ahaan xaqa ay u leeyihiin inay si nabad iyo sharaf leh ugu noolaadaan dhulkooda.
Safiirka Soomaaliya ayaa ugu baaqay beesha caalamka inay qaadato mas’uuliyaddeeda, isla markaana la joojiyo colaadda, lana xoojiyo dadaallada diblomaasiyadeed ee lagu gaari karo xabbad-joojin dhameystiran iyo xal cadaalad ah oo waara.
