Wararka24: Dowladda Federaalka Soomaaliya ayaa shaacisay inay qorsheynayso in si rasmi ah loo bilaabo howlaha sahaminta iyo qodista shidaalka ee ceelka Holhol, kaddib heshiis ay la gashay shirkad Soomaaliyeed oo loo xilsaaray fulinta mashruuca.
Agaasimaha Guud ee Wasaaradda Batroolka iyo Macdanta, Maxamed Xaashi Carabeey, oo ka hadlay magaalada Laascaanood, ayaa sheegay in shirkadda loo xilsaaray mashruuca la filayo inay dhowaan billowdo howlaha sahaminta iyo qodista. Wuxuu xusay in mashruucan uu qayb ka yahay qorshaha dowladda ee lagu horumarinayo ka faa’iidaysiga khayraadka dabiiciga ah ee dalka.
Carabeey ayaa sheegay in bulshada deegaanka laga filayo inay ka faa’iidaysato mashruuca, isaga oo xusay in la abuuri doono fursado shaqo iyo dhaqdhaqaaq dhaqaale oo la xiriira howlaha shidaalka. Wuxuu sidoo kale sheegay in gobollada Sool iyo Sanaag ay hodan ku yihiin macdanta, balse loo baahan yahay in qodista lagu maamulo hannaan sharciyeysan.
Sidoo kale, Agaasimaha Guud ayaa sheegay in Wasaaradda Batroolka iyo Macdanta ay diyaarisay hindise sharciyeed lagu maamulayo khayraadka macdanta, kaas oo la qorsheynayo in la horgeeyo Baarlamaanka marka uu dib u furmo, si loo helo nidaam mideysan oo lagu maamulo waaxdaas.
Dowladdu waxay sheegtay in haddii si hufan loo maareeyo soo saarista khayraadka dabiiciga ah ay Soomaaliya ka faa’iidi karto koboc dhaqaale iyo horumar. Dhanka kale, khubarada ayaa muddo dheer ku baaqayay in horumarinta khayraadka lagu saleeyo maamul wanaag, daahfurnaan iyo heshiis ay ku wada qanacsan yihiin dhammaan dhinacyada ay khusayso, si looga fogaado khilaafaad la xiriira ka faa’iidaysiga khayraadka dalka.
