Wararka24: Golaha Wasiirrada Xukuumadda Federaalka Soomaaliya ayaa ansixiyay heshiis is-afgarad (MoU) oo ay Soomaaliya iyo Masar ku xoojinayaan iskaashiga dhinacyada gaadiidka badda iyo horumarinta dekadaha.
Heshiiska ayaa u dhexeeya Wasaaradda Gaadiidka ee Jamhuuriyadda Carabta ee Masar iyo Wasaaradda Dekadaha iyo Gaadiidka Badda ee Jamhuuriyadda Federaalka Soomaaliya. Ujeeddadiisu waa horumarinta kaabeyaasha dekadaha, is-dhaafsiga khibradaha farsamo, tayeynta hay’adaha ka shaqeeya gaadiidka badda iyo waafajinta adeegyada heerarka caalamiga ah.
Wasiirka Dekadaha iyo Gaadiidka Badda, Cabdulqaadir Maxamed Nuur, ayaa sheegay in ansixinta heshiiskan ay tahay tallaabo muhiim ah oo lagu dardargelinayo horumarinta kaabeyaasha dhaqaalaha dalka iyo xoojinta iskaashiga Soomaaliya la leedahay dalalka gobolka iyo caalamka.
Sida ay Wasaaradda Dekadaha iyo Gaadiidka Badda sheegtay, heshiiska ayaa horseedi doona iskaashi ballaaran oo ku saabsan horumarinta dekadaha, is-weydaarsiga aqoonta iyo farsamada, tababarrada xirfadeed iyo kor u qaadidda awoodda hay’adaha ka shaqeeya waaxda badda.
Wasaaraddu waxay sidoo kale xustay in heshiiskan uu qeyb ka yahay qorshaha dowladda ee lagu horumarinayo kaabeyaasha dhaqaalaha, kor loogu qaadayo tartanka dekadaha Soomaaliyeed iyo xoojinta doorka Soomaaliya ee ganacsiga iyo isu-socodka badda ee gobolka.
Heshiiska ayaa la filayaa inuu taageero hirgelinta Qorshaha Isbeddelka Qaranka (NTP), iyadoo dowladda ay rajo ka muujisay inuu gacan ka geysto casriyeynta adeegyada dekedaha, kobcinta dhaqaalaha ku tiirsan badda iyo sare u qaadidda awoodda Soomaaliya ee ka faa’iideysiga fursadaha dhaqaale ee marin-biyoodkeeda.
