Wararka24: Maraykanka ayaa xalay fuliyay mowjad cusub oo duqeymo ah oo ka dhan ah bartilmaameedyo ku yaalla gudaha Iran, iyadoo tallaabadaasi sii kordhisay xiisadda gobolka, xilli ay jiraan warar sheegaya in xabbad-joojintii hore oo u dhexeysay labada dhinac ay sii wiiqmeyso.
Sida ay baahiyeen warbaahinno caalami ah, weerarrada ayaa lagu beegsaday deegaanno ay ka mid yihiin Iranshahr, Bandar Abbas, Konarak, Chabahar, Bushehr iyo Aq Qala. Wakaaladda wararka Iran ee IRNA ayaa sheegtay in hal qof oo ka tirsanaa shaqaalaha dab-damiska uu ku dhintay weerar ka dhacay garoonka diyaaradaha ee Iranshahr.
Taliska Dhexe ee Ciidamada Maraykanka (CENTCOM) ayaa sheegay in duqeymaha lagu fuliyay amar ka soo baxay Madaxweynaha Maraykanka, Donald Trump. Sida uu talisku sheegay, ujeeddada howlgalka ayaa ahayd in lagu wiiqo awoodda Iran ee lagu carqaladeyn karo isu-socodka maraakiibta ganacsiga ee marinka istaraatiijiga ah ee Hormuz.
CENTCOM ayaa sidoo kale ku eedeeyay Iran inay mas’uul ka tahay weerarro lagu qaaday maraakiibta ganacsiga iyo shaqaalaha rayidka ah ee isticmaala marin-biyoodka Hormuz, eedeymo aysan dowladda Iran si rasmi ah u aqbalin.
Dhanka kale, warbaahinta Iran ayaa sheegtay in nidaamyada difaaca cirka ay ka hortageen bartilmaameedyo hawada ku jiray oo ku dhow dekedda Bandar Abbas. Wararka gudaha Iran ayaa sidoo kale sheegay in weerarro lagu qaaday xarumo ku yaalla Chabahar iyo buundo tareen oo ku taalla magaalada Aq Qala, inkastoo aan si madax-bannaan loo xaqiijin khasaaraha ka dhashay.
Saacado kadib weerarrada, seeriga digniinta ayaa laga maqlay dalka Baxrayn, halka Wasaaradda Gaashaandhigga Kuweyt ay sheegtay in nidaamyadeeda difaaca cirka ay la tacaaleen gantaallo iyo diyaarado aan duuliye lahayn oo kusoo wajahnaa hawadooda.
Duqeymihii ugu dambeeyay ayaa kusoo aadaya iyadoo xaaladda amni ee Bariga Dhexe ay sii cakirmeyso. Inkastoo dhinacyadu ay hore u muujiyeen rabitaan ku aaddan xabbad-joojin, haddana is-weydaarsiga weerarrada iyo hadallada kulul ayaa sare u qaaday walaaca laga qabo in xiisaddu isu beddesho dagaal ballaaran oo gobolka saameeya.
