Wararka24: Guddiga Madaxa-bannaan ee Doorashooyinka Qaranka iyo Soohdimaha ayaa si rasmi ah u shaaciyay liiska 35 urur siyaasadeed ee loo oggolaaday inay ka qayb galaan doorashooyinka isku sidkan ee Dowlad-goboleedka Galmudug, kuwaas oo qayb ka ah hirgelinta nidaamka doorashada qof iyo cod ee dalka.
Guddiga ayaa sheegay in ururradan ay ku tartami doonaan doorashooyinka golayaasha deegaanka iyo heerarka kale ee qorshuhu yahay in laga qabto Galmudug. Tallaabadan ayaa daba socota diiwaangelinta codbixiyeyaasha iyo diyaarinta goobaha codbixinta oo muddooyinkii u dambeeyay ka socday deegaannada maamulkaas.
Sida uu guddigu sheegay, shaacinta liiska ururrada siyaasadeed waxay qayb ka tahay dadaallada lagu dardargelinayo geeddi-socodka doorashooyinka, iyadoo dowladda federaalku ku tilmaantay qorshahan tallaabo muhiim u ah u gudbidda nidaamka doorashada qof iyo cod. Si kastaba ha ahaatee, hannaankan ayaa weli wajahaya dood siyaasadeed iyo aragtiyo kala duwan oo ay qabaan qaar ka mid ah saamileyda siyaasadda Soomaaliya.
Guddiga Doorashooyinka Qaranka ayaa ugu baaqay ururrada siyaasadeed, musharraxiinta iyo shacabka Galmudug inay si dhow ula shaqeeyaan guddiga, isla markaana u hoggaansamaan shuruucda iyo habraacyada doorashada si loo xaqiijiyo hannaan doorasho oo hufan, nabdoon isla markaana loo dhan yahay.
Liiska ururrada loo oggolaaday ka qaybgalka doorashooyinka aya warsaxaafadeedka ku xusan:
Doorashooyinka Galmudug ayaa si dhow isha loogu hayaa, maadaama ay ka mid yihiin wejiyada ugu horreeya ee lagu tijaabinayo hirgelinta nidaamka doorashada qof iyo cod. Natiijada iyo habsami u socodka geeddi-socodkan ayaa la filayaa inay saameyn ku yeeshaan qorshayaasha doorasho ee laga hirgelinayo maamullada kale ee dalka iyo jihada isbeddelka nidaamka doorashooyinka Soomaaliya.
