Wararka24: Guddiga Madaxa-Bannaan ee Doorashooyinka Qaranka iyo Soohdimaha ayaa ku dhawaaqay in dib loo dhigay jadwalkii doorashooyinka Golaha Deegaanka iyo Golaha Wakiillada Dowlad-Goboleedka Galmudug, iyo sidoo kale doorashada guddoonada golayaasha deegaanka ee Gobolka Banaadir.
War-saxaafadeed uu guddigu soo saaray ayaa lagu sheegay in go’aanka dib loogu dhigay doorashooyinka uu yimid kadib wada-tashi lala yeeshay ururrada siyaasadda, iyadoo la tixgeliyay codsiyo loo gudbiyay guddiga iyo baahida loo qabo in la dhammaystiro diyaar-garowga farsamo iyo maamulka doorashooyinka.
Guddigu wuxuu sheegay in doorashada Golaha Deegaanka iyo Golaha Wakiillada Galmudug, oo markii hore loo qorsheeyay 20-ka Luulyo, hadda loo asteeyay 25-ka Luulyo 2026. Sida lagu sheegay bayaanka, waqtiga dheeraadka ah ayaa loogu talagalay in lagu dhammaystiro hawlaha la xiriira qabanqaabada doorashada iyo diyaarinta hannaan hufan oo loo maro geeddi-socodka codbixinta.
Sidoo kale, guddiga ayaa shaaciyay in dib u eegis lagu sameynayo jadwalka doorashada guddoonada golayaasha deegaanka ee Gobolka Banaadir, kadib markii la qiimeeyay heerka diyaar-garowga iyo natiijooyinka ka soo baxay wada-tashiyada ay la yeesheen ururrada siyaasadeed.
War-saxaafadeedka ayaa intaas ku daray in ururrada siyaasadda looga baahan yahay inay si degdeg ah u soo gudbiyaan liisaska musharraxiintooda, si loo dardargeliyo howlaha harsan ee la xiriira doorashooyinka.
Guddigu wuxuu sidoo kale ugu baaqay Wasaaradda Arrimaha Gudaha inay sii xoojiso tababarka iyo wacyigelinta xubnaha golayaasha deegaanka ee la dooranayo, si ay ugu diyaar garoobaan gudashada waajibaadka iyo masuuliyadaha horyaalla.
Guddiga Madaxa-Bannaan ee Doorashooyinka Qaranka iyo Soohdimaha ayaa ugu dambeyn sheegay inuu ka go’an yahay qabashada doorashooyin xor ah, hufan oo waafaqsan shuruucda dalka, isagoo ugu baaqay dhammaan daneeyayaasha inay sii wadaan wada-shaqeynta si loo xaqiijiyo geeddi-socod doorasho oo lagu kalsoonaan karo.
