Wararka24: Dowladda Federaalka Soomaaliya ayaa walaac ka muujisay adeeg cusub oo ay shirkadda Meta qorsheyneyso inay kusoo kordhiso WhatsApp, kaas oo u saamaxaya isticmaaleyaasha inay adeegsadaan magac gaar ah (username) halkii laga isticmaali lahaa lambarka taleefanka.
Hay’adda Isgaarsiinta Qaranka (NCA) ayaa sheegtay in isbeddelkan uu keeni karo caqabado la xiriira dhinaca amniga, maadaama uu adkeyn karo aqoonsiga dadka adeegsanaya barnaamijka, xilli dalka uu weli wajahayo khataro amni iyo falal la xiriira dambiyada abaabulan.
Agaasimaha Hay’adda Isgaarsiinta Qaranka, Mustafa Yaasiin Sheekh, ayaa sheegay in dowladda Soomaaliya aysan taageersaneyn hirgelinta adeeggan cusub, isaga oo xusay in arrinta ugu weyn ee walaaca dhalineysa ay tahay saameynta uu ku yeelan karo la socodka iyo ka hortagga falalka khatarta ku ah amniga qaranka.
Mas’uuliyiinta hay’adda ayaa tilmaamay in Soomaaliya ay la wadaagto walaaca ay dalal kale ka muujiyeen isbeddelkan, gaar ahaan marka la eego saameynta uu ku yeelan karo awoodda hay’adaha amniga iyo kuwa sharci fulinta ee dabagalka dambiyada lagu fuliyo adeegyada casriga ah.
Hay’addu waxay sheegtay in dowladda ay waajib ka saaran tahay ilaalinta amniga isgaarsiinta dalka, isla markaana ay muhiim tahay in si taxaddar leh loo qiimeeyo adeeg kasta oo cusub oo lagu soo kordhiyo tiknoolajiyadda isgaarsiinta.
Mas’uuliyiinta ayaa sidoo kale adkeeyay in isbeddellada lagu sameeyo adeegyada dhijitaalka ah ay u baahan yihiin daraasad qoto dheer oo lagu eegayo saamaynta ay ku yeelan karaan amniga, gaar ahaan marka laga hadlayo la dagaallanka kooxaha hubeysan iyo shabakadaha dambiyada abaabulan.
Doodda ku saabsan isku dheelitirka u dhexeeya ilaalinta asturnaanta isticmaaleyaasha iyo sugidda amniga ayaa sii xoogeysaneysa, xilli shirkadaha tiknoolajiyadda ay sii kordhinayaan adeegyada kor u qaadaya qarsoodiga iyo ilaalinta xogta dadka isticmaala aaladaha casriga ah.
